A Coruña e Ponteceso lembran os cen anos do busto de Pondal nos Xardíns de Méndez Núñez

Círculo de Artesáns e Fundación Eduardo Pondal, co respectivo apoio dos Concellos da Coruña e Ponteceso, promoveron onte nos Xardíns Méndez Núñez da cidade herculina un acto conmemorativo e ofrenda floral polos cen anos do busto do bardo, autor da letra do Himno galego, figura clave do Rexurdimento, pontecesán de nacemento, mais tamén sentido e reivindicado como coruñés, tal e como se dixo no momento da recepción. Loouse dende o Círculo de Artesáns a figura e obra de quen mereceu que se lle dedicase a primeira escultura da cidade levanta na honra dun autor galego. Henrique Rabuñal, na súa posterior alocución, incidiu no peso da obra pondaliana e mesmo trasladou, aludindo a un estudo recente do estudoso Manuel Ferreiro, que o bardo chegou a crear un par de obras de teatro. Rabuñal entrou de cheo na súa transcendencia, e lembrou que Pondal, descendentes de Rosalía de Castro ou Curros descansan no cemiterio de San Amaro.

Nun acto que definiu como «democrático», Gonzalo Castro, edil de Cultura na Coruña, destacou o vínculo de Pondal coa cidade, así como o contemporáneo do seu pensamento e a importancia que este tivo para a creación do pensamento galeguista. Membros de Donaire sumaron varias pezas musicais á velada, que concluíu co Himno. Entre os presentes, ademais do alcalde de Ponteceso, José Manuel Mato; membros da Fundacións Pondal, co seu presidente, Xosé María Varela, á cabeza, ou Enrique Sáez, presidente da Fundación Juana de Vega.

---

---

---