Abril comezará cargado de actividade
30 mar 2025 . Actualizado a las 05:00 h.O Concello da Laracha propón para abril o Mes do Libro e a Primavera teatral, esta última, en Paiosaco. Trátase de dúas citas con dilatada tradición na localidade por estas datas.
Para o fomento da lectura, dende o consistorio propoñen catro contacontos e un obradoiro. Está dirixida esta programación ao público infantil e familiar. A asistencia será gratuíta e só será necesaria a inscrición previa para o taller de danza e narración oral.
Desenvolverase na Laracha, Paiosaco e Caión, e a primeira cita será o próximo domingo, día 6, ás 12.00 horas, no baixo da biblioteca da Laracha. Conta coa colaboración da Dirección Xeral de Política Lingüística da Xunta.
Xa en Paiosaco terá lugar a catorce edición de Primavera teatral. Tres serán as obras, para público xeral e con carácter gratuíto os venres 4, 11 e 25 ás 21.00 no centro sociocultural. Haberá dúas comedias e as temáticas irán dende o galego á vellez e ao turismo.
O Concello da Laracha tamén oferta unha excursión para maiores. A viaxe será a Toledo, do 5 ao 9 de maio, aínda que a preinscrición deberá formalizarse do 1 ao 3 de abril no edificio administrativo da Laracha. Terá un custo de 470 euros con pensión completa, visitas guiadas, entradas e seguro de viaxe, e un plus de 84 euros para aquelas persoas que queiran habitación individual. O Concello financia o gasto do transporte en autobús. Tamén se visitarán as localidades de Torrijos e Talavera de la Reina e o parque Puy du Fou España.