María Carmen Vila, PSOE de Carballo: «Temos un programa ambicioso, con propostas todas realizables»

María Carmen Vila Blanco (1967) encabeza por terceira vez a candidatura socialista en Carballo.

—E desta vez, con seis partidos.

—É unha situación novedosa, benvido todo o mundo que dea un paso adiante. Os grupos somos un reflexo da sociedade, e canto máis representada estea, mellor. Como afectará? Non se sabe. Hai un grupo que non se presenta, que tiña dous edís, e hai candidaturas novas.

—Que obxectivo se marca o PSOE?

—Acadar a alcaldía, e conformar un goberno para mellorar a vida dos veciños. Temos un programa ambicioso, as nosas propostas son todas realizables, non hai macrodesenvolvementos que igual non se logran: hai que ser humildes, sinceros e dicir a verdade. Propoñer algo construtivo.

—Que balance fai do mandato?

—Enfrontámonos a un goberno con maioría absoluta, e iso fai que a oposición estea limitada cos seus proxectos. Nós presentamos máis de cen iniciativas entre mocións, rogos e preguntas. E conseguimos mellorar os pasos de peóns, ter en conta as barreiras arquitectónicas, prazas para embarazadas, máis para a infancia... Pouco a pouco conseguimos cousas, e aprobáronnos a maiorías das mocións. Así que estamos satisfeitos, sabendo que hai que ser ambiciosos. Por que unhas cousas si e outras non? As maiorías son as que son. Nós podemos apoiar, criticar e propoñer alternativas.

—Que destaca do seu programa?

—Temos varias cousas, e novidosas. Non renunciamos ao edificio de entidades sociais, como hai catro anos. E a variante, e a ampliación do polígono, non podemos perdelos de vista. Impulsaremos agricultura ecolóxica de calidade, coa marca Carballo verde. Reparación de bicis de acceso público, novo estudo do espazo público por distritos, reordenación de accesos ao casco urbano e do tráfico, ter unha gran praza...

---

---

---