Como manda a tradición, logo da misa solemne levouse a cabo a tradicional poxa de galos
17 jun 2025 . Actualizado a las 05:00 h.«Quen poxa polos galos de San Adrián, cen anos vivirá». Con semellante sentenza abriu onte Encarna Iglesias Trillo a poxa de galos que, como manda a tradición, se celebrou onte en Toba (Cee) logo da misa solemne pola romaría de San Adrián.
Aínda que a rifa dos animais comezou con certa timidez, enseguida comezaron a aparecer os primeiros interesados, e o exemplar inaugural foi finalmente despachado por 25 euros. Trinta e cinco a parella, vinte por outro galo solitario, outros trinta por un par de aves... E así ata completar os exemplares dispoñibles, sendo algúns deles mesmo poxados en máis dunha ocasión para maior esmola ao santo.
A de onte foi unha xornada solleira con alboradas, charangas e a actuación da Coral Costa da Morte. Os párrocos que tomaron parte no festexo relixioso tamén aproveitaron para anunciar a festa solidaria que está a preparar a ONG Egueire.