«Para min, como alcaldesa e veciña, é converter estas festas en algo inesquecible para todos os ceenses e os que nos visitan», asegura Margarita Lamela
13 ago 2025 . Actualizado a las 05:00 h.Alcaldesa de Cee, Margarita Lamela Louzán, recoñece que os días de festa descansa pouco.
—Por que?
—Porque estou moi pendente de todo. Estou operativa as 24 horas. Quero que saia todo perfecto, que non haxa incidencias e que a xente goce das celebracións con total tranquilidade. O meu desexo é que as da Virxe da Xunqueira sexan unhas festas inesquecibles para todos os veciños e veciñas e tamén para os que nos visitan nesta semana grande para a nosa vila.
—Que representa, como veciña e alcaldesa, esta semana grande?
—Sentimento, unidade veciñal, un momento de encontro único, excepcional e inesquecible. Lémbrame a cando era rapaza e me xuntaba cos compañeiros e os amigos. Lembro as bandas de música, os fogos artificiais. Cando era nena eran dos mellores festas de toda a contorna. Só había fogos así de espectaculares en Cee e Muxía.
—Con que goza máis do cartel?
—Sempre sentín predilección polas bandas de música. Dende moi nena. Os concertos non mos perdo nunca. Xunto cos fogos artificiais, é o que máis me gusta. Aínda que tamén vou á sesión vermú e dou un paseo polas noites.
—Este ano, ademais, o Concello nomea á Virxe da Xunqueira alcaldesa perpetua.
—Para min é un dos momentos máis importantes como veciña e tamén como alcaldesa de Cee. Entregar de forma simbólica á nosa virxe o bastón de mando, un acto que será o día 14, coa celebración da novena das oito da tarde. Sairá portando o bastón coa procesión. Os que somos de Cee non contamos os anos de un de xaneiro en un de xaneiro. Nós facémolo de Xunqueira en Xunqueira. Cando rematan as festas, coincidindo con San Roque [16 de agosto], é cando empezamos a contar o ano os veciños de Cee.
—Fágame de guía turística e recomende os sitios privilexiados que hai que visitar este verán no seu municipio.
—Cee é cultura e comercio, é unha porta ao mar e á historia. É un museo ao aire libre, séculos de historia. Dende esculturas en homenaxe aos peregrinos ata símbolos que nos lembran o noso pasado baleeiro, como é Caneliñas, a última factoría que estivo operativa en Europa. Na capital municipal temos o paseo marítimo, o museo Fernando Blanco, a alameda, o mercadiño dominical, a praza do Olvido, a de Otero Lastres... Pero saíndo de Cee, as nosas parroquias son sinónimo de beleza, de paisaxes únicas, de gastronomía quilómetro cero. Empezando pola ermida de San Pedro e a baixada cara o que é a primeira fiestra ao mar do Camiño de Fisterra e Muxía. Tamén temos o miradoiro de Gures e a súa paradisíaca praia, e Estorde e as súas perseidas e o seu mar de ardora. A praia das Leiriñas, na Ameixenda. O entorno de Lires e o seu solpor único en toda comarca. Somos tamén itinerario do Camiño dos Faros, do Camiño Xacobeo... O que vén a Cee namórase da súa cultura, da súa paisaxe, da súa gastronomía e das súas xentes.