O Fisterra Experience 2025, ao completo: así será o festival 

Do venres 27 ao domingo 29 de xuño • Xa se coñecían as datas e algúns dos artistas participantes, mais agora o menú do festival Fisterra Experience xa está ao completo. A Pedreira, Baiuca, DJ Mil, Rapacollóns Big Band, Cigani, Thomas Kretzschmar con David Regueiro, Sabela and The Heart Breakers, Helena Egea, Mondra, MFC Chicken, Marta Lado e Modesto Fraga sumando historias fisterrás, Brass Atlantic Band, Andhrea and The Black Cats e DJ Vilouta irán desfilando ao pé «do cabo máis occidental de Europa» entre o venres 27 e do domingo 29 de xuño, é dicir, a vindeira fin de semana. Non o farán por un único escenario, senón que serán cando menos media ducia os da cita.

O Escenario Xacobeo (rúa da Foliada), o Escenario Fisterra (Praza da Constitución), o Escenario Atlántico (lugar de San Roque), o Semáforo de Fisterra (no faro), Cruceiros Fisterra (música a bordo) e as rúas, con música itinerante de bandas, descentralizarán este festival que se consolida como «único», coa «música e o territorio dialogando en harmonía coa natureza». Así o referencian dende a organización cun programa que mestura «vangarda e tradición», un Fisterra Experience que «destaca por ser un festival non masificado, sostible e integrador, recoñecido co selo BGreenly de Evento Sostible».

A entidade referencia no seu informe «a aposta pola calidade, o impacto positivo na vila, o compromiso ambiental e o fomento da comunidade local como sinais de identidade». Suman forzas para facer este encontro posible Concello de Fisterra, Nordesía, Xacobeo, Estrella Galicia, Xunta, Deputación, Bela Fisterra Hotel, Cruceros Fisterra e O Semáforo, xa sexa como organización ou brindando colaboración a esta.

As entradas

Xa están dispoñibles os billetes, a partir de 18 euros, para o Fisterra Experience en enterticket.es, con opcións para abonos, entradas de día e acceso a concertos especiais como ben pode ser o de música a bordo, navegando fronte ao cabo con Sabela & The Heartbreakers. Pezas de cantautora, electrónica, experiencias audiovisuais arredor da música e historia contemporáneas, charangas festivas, humor, virtuosismo ao violín, clásicos do blues, do gospel ou do country, o mundo das cantigas o e o baile tradicional, bandas de vento e percusión ou un DJ que é profeta na súa terra. De todo iso haberá no Fisterra Experience, para o que xa non queda nada. Comeza a conta atrás!

---

---

---