Consenso en Malpica sobre o papel da poesía popular oral na promoción da lingua galega

Ao pé das Torres de Mens, na terra natal de catro das mulleres homenaxeadas este ano pola Real Academia Galega, tivo lugar este sábado o acto institucional conmemorativo polo Día das Letras Galegas. Un acto que estivo presidido polo titular do Goberno autonómico, Alfonso Rueda, e no que quedou patente a relevancia que tivo a poesía popular oral na conservación e promoción da lingua galega. «A música deste país soa máis en galego grazas a elas», sentenciou Felisa Segade, integrante de Leilía, en referencia ás cantareiras: «Elas foron as creadoras e as gardiás da tradición popular e da fala. Se non fose por elas [...] hoxe non estariamos aquí», continuou.

O presidente da Real Academia Galega, pola súa banda, recalcou que esas cantigas que tantas veces soaron nas voces de Rosa e Adolfina Casás, Eva Castiñeira e Manuela Lema, Teresa García e Prudencia e Asunción Garrido (catro das Pandeireteiras de Mens), son auténticas «obras de artesanía verbal». Tamén fixo referencia Henrique Monteagudo ao feito de que a Costa da Morte siga sendo o principal refuxio da lingua galega: «As xentes [desta comarca] gardaron como en ningún outro lugar o orgullo de falar a nosa fala. Sodes un exemplo a seguir», dixo durante un acto ao que asistiron o presidente do Parlamento de Galicia, Miguel Ángel Santalices; o delegado e a subdelegada do Goberno, Pedro Blanco e María Rivas; varios conselleiros, deputados, parlamentarios e representantes de Administracións locais e das universidades de Santiago e A Coruña.

Contou coa intervención musical das agrupacións tradicionais Malante e Raigañas, entregáronse exemplares dos libros Canto popular gallego (Luis María Fernández Espinosa) e Pandeireteiras (Xosé Manuel e Icía Varela, con ilustracións de Nerea Gómez) e estivo presentado pola propia Icía. O rexedor malpicán, Eduardo Parga, aproveitou a súa quenda de palabra para agradecer á Xunta e á RAG que lle teñan «dado luz a este patrimonio» que é a poesía popular oral. «Honrar a nosa lingua é honrar o que somos», salientou.

O presidente da Xunta, pola súa banda, ofreceu un extenso discurso no que loou o labor das homenaxeadas e no que apelou a un «bilingüismo cordial» como fórmula de preservación da lingua galega. «A pervivencia e promoción do idioma virá da man do alento e do reforzo en positivo, xamais da imposición nin da obrigatoriedade», recalcou o titular do Goberno autonómico.

Rematado o acto, a actividade trasladouse ao centro cívico malpicán, onde a RAG celebrou unha sesión plenaria extraordinaria. Alí, o secretario xeral do PSdeG, José Ramón Gómez Besteiro, reclamoulle á Xunta e ao PP «vontade política» para defender un idioma que actualmente pasa «unha mala situación», dixo.

---

---

---