Xabier Díaz, Alana ou Mercedes Peón, na Festa Galega de Malpica

Que Malpica é un municipio festeiro é por todos sabido. Co horizonte posto xa no mes de agosto, vén de anunciar o Concello unha nova edición da súa Festa Galega, a número 16. Será os días 15 e 16, no porto, e máis concretamente na zona do travelift. Dúas xornadas intensas, avanzan, para un encontro coa música e coa tradición, no que a vila será «escenario privilexiado» para gozar da cultura propia a través das voces e sons das mellores agrupacións tradicionais. Concertos, cantareiras e espectáculos de referencia, entre os que ben poden destacar todos os nomes, comezando polo de Xabier Díaz e Adufeiras de Salitre, Alana e Mercedes Peón. Non menor relevancia merece a presenza das agrupacións Carcaxía, Malante, Raigañas, Do Rivés e Tanto nos Ten. 

Xabier Díaz, xustamente, vén de ofrecer un dos Concertos con Encanto deste verán no dolmen Dombate, en Cabana. Unha actuación, este pasado xoves, que reuniu nutrido público e que deixou imaxes coma esta, coa forza do megálito como escenario. 

«A Festa Galega é unha homenaxe ás nosas raíces, un punto de encontro interxeracional onde tradición e innovación musical conviven para poñer en valor o noso patrimonio cultural inmaterial», di o Concello, que ten para esta festa a colaboración da Xunta, Axencia de Turismo de Galicia, Deputación e Confraría de Pescadores.

---

---

---