A editorial Medulia lanza unha nova edición do Premio de Poesía Eduardo Pondal
PONTECESO
É xa a sétima convocatoria, con prazo aberto para remitir os traballos ata o vindeiro 7 de maio
02 abr 2025 . Actualizado a las 17:16 h.Ata o 7 de maio • A editorial Medulia, con fonda vinculación á Costa da Morte por ser un dos seus piares a cormelá Diana Varela Puñal (imaxe superior), vén de convocar unha nova edición do seu premio de poesía Eduardo Pondal. É xa o sétimo ano que se leva a cabo esta iniciativa, sempre co afán de «estimular a creatividade literaria» e de «honrar a figura do autor do Himno Galego».
Segundo as bases divulgadas, poderán concorrer todos os autores e autoras que así o desexen —agás os premiados en edicións anteriores—, con obras de temática libre e escritas en galego. Os textos deberán ser orixinais e inéditos, cunha extensión mínima de 400 versos e máxima de 1.000. Todos os traballos han de presentarse de xeito anónimo, con título e lema ou pseudónimo, remitindo en sobre pechado os datos persoais e un breve currículo. O envío, sempre antes do 7 de maio, ha de facerse por correo postal, á sede da editorial, na Coruña.
O gañador ou gañadora levará diploma, pergameo e a obra única e orixinal dun artista galego, que tamén será empregada para ilustrar a capa do volume, pois a obra será editada por Medulia. O xurado, constituído por membros de «recoñecido prestixio», fará pública a súa decisión coincidindo coas Letras Galegas (17 de maio). Bases ao detalle na editorial e nas súas redes.