Apandemia do covid-19 tamén vai condicionar a conmemoración do 1.º de Maio do 2020, Día Internacional da Clase Traballadora, ao non poder celebrarse a tradicional manifestación nin calquera outro acto público.
O tamén coñecido como coronavirus cebouse coas nosas persoas maiores, contándose as mortes e os contaxios en decenas de miles. Pero tamén está a ter enfronte ao noso persoal sanitario, nunca valorado dabondo. Traballadoras e traballadores, que en boa parte levan en precario moitos anos, e que mesmo para facer fronte aos efectos deste virus fixérono en situacións de claro risco ao non poder contar co material preventivo imprescindible, o que está a causar decenas de miles de contaxios en persoas traballadoras de hospitais, de centros de saúde, de residencias de maiores, de atención á dependencia en domicilios, de farmacias, de transporte sanitario e de todos aqueles que seguen a traballar en servizos esenciais para garantir a nosa seguridade e abastecemento. É de xustiza destacar o compromiso e a profesionalidade do noso persoal sanitario, como facemos a diario desde as nosas xanelas, aplaudíndolles en recoñecemento e para darlles máis ánimos.
Aínda así, pode seguir habendo máis vítimas, no que ao emprego se refire. O risco do contaxio motivou que o Goberno paralizara gran parte da actividade produtiva, cando aínda as economías familiares non estaban recuperadas da anterior crise, xa que a pesares de que se estivese reducindo o desemprego, estaba a xeneralizarse a precariedade no emprego que se creaba.
Pero aínda sen manifestación, a conmemoración deste 1.º de Maio na Coruña vai supor un punto de inflexión no que afectación da pandemia na nosa cidade e na nosa comarca se refire. A loita dos nosos profesionais sanitarios e o compromiso cívico da cidadanía confinada por máis de 40 días xa están a dar resultado. Estase reducindo o contaxio e cada vez hai máis altas nos hospitais. Dende UGT e CC.OO. estase a manter a actividade, dando toda a cobertura ás persoas que a precisan, e estase demandando unha estratexia económica coordinada de todas as Administracións que interveñen na nosa comarca (concellos, Deputación, Xunta e Goberno), que ten pendente afrontar o grave proceso de desindustrialización que estamos a padecer (nin sequera está resolto aínda o futuro da antiga planta de Alcoa na Coruña). Agora urxe que aborden o mantemento da actividade económica e a cobertura social extraordinaria para quen nesta etapa perda o seu traballo e os seus ingresos. Xa hai medidas aprobadas nese sentido, desde varios Concellos e a Deputación. Tamén o Goberno de España adoptou medidas de apoio desde distintas frontes (emprego, impostos, vivenda…). A nosa comarca precisa que esas medidas se coordinen, e este 1.º de Maio, dende CC.OO. e UGT reivindicamos a nosa participación nese proceso.
José Carrillo e Cristóbal González son secretarios xerais comarcais na Coruña de UGT e CC.OO., respectivamente