O Rosalía, por dentro e por fóra, acubillou actos das Letras
18 may 2025 . Actualizado a las 21:25 h.Este ano, a Festa das Letras vense estendendo máis que os pasados, coma os ecos das pandeireteiras homenaxeadas, e os actos para campar da lingua aínda seguen. Este domingo foron moitas as actividades que se salpicaron ao longo de toda a xornada. Entre elas, dúas que tiveron o Teatro Rosalía de Castro —quen mellor reivindicando o galego— como escenario principal, por dentro e por fóra.
A media mañá, os soportais do teatro, moi preto de onde hai 109 anos naceron as Irmandades da Fala da man de Antón Vilar Ponte, acubillaron a xuntanza central, aberta e participativa, da Agrupación Cultural Alexandre Bóveda. En colaboración coa Asociación de Escritoras e Escritores en Lingua Galega, houbo lectura de poesía e cantos populares, así como un obradoiro dirixido por Marta Pumares para aprender tres pezas de Adolfina e Rosa Casás Rama, Eva Castiñeira Santos, e as Pandeireiteiras de Mens, Manuela Lema, Teresa García Prieto, Prudencia e Asunción Garrido Ameixenda.
Horas despois, ás sete do serán, as mesmas mulleres que preservaron a tradición oral convertida en arte viva de xeración en xeración foron tamén as protagonistas dun aniversario non pequeno. A Agrupación Folclórica Aturuxo dedicoulle a elas a gala do seu 70.º aniversario nunha festa con Follas Novas e Pandeireteiras de Encrobas. Bo peche para unha xornada na que en galego tamén se rezou, e por primeira vez na historia, na misa da igrexa ortodoxa San Juan Crisóstomo.