Miles de persoas déronse cita o día de San Roque en Betanzos para compartir a ledicia de ver elevarse o globo de papel máis grande do mundo. Despois de que no ano 2023 os deuses decidiran que o aeróstato non se mecera nas mans de Eolo, señor dos ventos, por fin puidemos gozar desa marabillosa coreografía do inflado e elevación do símbolo por antonomasia dos betanceiros. Desde hai anos existe unha estendida lenda na que se asegura que o globo cando se ergue ao ceo, nunha primeira etapa, vai cara ao cemiterio municipal de Betanzos, din que a renderlle homenaxe e tributo de agradecemento ao seu creador, Claudino Pita, soterrado naquel camposanto. Logo, despois, xa se dirixe a onde os ventos o leven. Certo ou non, a lenda é ben acaída, porque de ben nacidos é ser agradecidos. E o globo non ía ser menos. Pois resulta que o deste ano, unha vez que soltou amarras, dirixiuse directamente cara a Coirós, precisamente a renderlle homenaxe e tributo de agradecemento á familia Rivera Valiño, os verdadeiros precursores da tortilla que tanta fama lle deu á vila betanceira. E non só veu agradecer tantos favores aos inventores deste prato típico que se converteu en reclamo turístico da vila, senón que quixo quedarse aquí para sempre, morrendo en Santa María de Ois, parroquia natal da tortilla, precisamente na aldea de Xora, onde aínda vive Elvira Rivera, neta da creadora da tortilla de Coirós e que conserva celosamente a receita tradicional deste manxar. Sen dúbida, o globo quixo agradecer publicamente con este xesto a relevancia e transcendencia que supón para Betanzos que a receita da súa famosa tortilla saíra dunha aldea de Coirós a finais do século XIX. Agardamos que se estenda o exemplo. Manuel Fiaño Sánchez e Miguel Gayoso Barreiro. Betanzos.