O Concello carballés e a UDC renovaron o convenio para o curso de verán sobre o galego
A CORUÑA CIUDAD
O alcalde de Carballo, Evencio Ferrero, e o reitor da Universidade da Coruña (UDC), Xosé Luís Armesto, asinaron onte na Coruña un convenio para dinamizar o galego cun curso de verán sobre a transmisión interxeracional. Será a décima edición do que organiza o Servizo de Normalización Lingüística da Universidade, que dirixe o profesor carballés Xosé Manuel Freixeiro Mato. Será no Fórum os días 9, 10 e 11 de xullo.
Ferrero destacou o éxito de anteriores edicións e doutros cursos feitos no Concello pola UDC. Dixo que froito dun seminario sobre urbanismo, retomaran a idea de derrube de muros co pintado de medianeiras. Resaltou o papel de «dirección intelectual da Universidade e a súa influencia nas vilas e no conxunto da sociedade».
O curso de verán que este ano tratará sobre a transmisión interxeracional do galego chega logo de nove edicións nas que se trataron propostas para a mellora do proceso de normalización da lingua.