Freixanes contempla optar á reelección na RAG cun proxecto de continuidade
CULTURA
O presidente saínte tomará a decisión definitiva nas vindeiras semanas
30 mar 2021 . Actualizado a las 05:00 h.A Real Academia Galega está en precampaña. O venres pasado celebrou un pleno no que se oficializou a conclusión do mandato de Víctor F. Freixanes e se abre o prazo para elixir unha nova executiva nun prazo máximo de tres meses. Contempla presentarse á reelección o presidente saínte? «Contemplo, pero non o teño decidido», sostivo este luns Freixanes, quen adiantou que nas vindeiras semanas tomará a decisión definitiva.
Trátase, segundo explicou, dunha «cuestión persoal», pero tamén colectiva. «É o resultado de falar cos compañeiros e compañeiras, cos que quero cambiar impresións para configurar un equipo, marcarnos uns obxectivos do que nos gustaría facer nos seguintes catro anos», ampliou Freixanes, quen tamén apelou: «Cada vez máis persoas que estamos na institución somos conscientes da necesidade de unir esforzos e vontades para sacar adiante as cousas, porque os desafíos son os que son. Económicos, pero tamén os derivados dos propios cambios sociais arredor da lingua e da sociedade en xeral». «Nestes catro anos de moitísimo traballo sentinme moi apoiado en xeral», engadiu.
Freixanes accedeu á presidencia da Academia en marzo do 2017 sendo candidato único. Unha circunstancia que podería repetirse agora, catro anos despois, xa que, segundo fontes coñecedoras do proceso electoral, a estas alturas parece pouco probable que se presente unha candidatura fronte a de Freixanes. Nas pasadas eleccións un grupo de críticos non asistiu ao plenario, amosando dese xeito a súa disconformidade co que consideraban afondar nunha división no seo da entidade. Descoñécese polo de agora se estes críticos repetirán a súa ausencia se finalmente non se concreta outra candidatura alternativa.
Intercambio
Entrementres, Freixanes explicou que a posibilidade da súa opción á reelección «vai depender moito do intercambio cos compañeiros e compañeiras», cos que traballará para buscar unha proposta que por un lado dea continuidade a proxectos postos en marcha nestes últimos catros anos e, por outro, avance novas iniciativas. O presidente saínte —agora ocupa interinamente a presidencia Henrique Monteagudo, responsable de poñer en marcha o proceso electoral— cre que hai necesidade dunha continuidade neses traballos para acadar todos os obxectivos marcados. O traballo dos departamentos técnicos da institución e a comunicación coa sociedade son os eixos fundamentais dun traballo que ten a súa cerna na lingua.
Entre esas cuestións que Freixanes considera de maior importancia, figuran a conexión coa mocidade —«preocúpanos moito a transmisión xeracional»— e o papel social do galego: «Reflexionar cos axentes sociais para ver que se pode facer para avanzar no uso da lingua». Neste sentido, a RAG desenvolve un traballo científico ao servizo da sociedade, que debe estar accesible, e iso implica o ámbito da comunicación. Un eido que, coas novas tecnoloxías, tamén é global. «O galego non é unha lingua local, ten que estar situada no mundo en relación co ámbito lingüístico ao que pertence», afirma Freixanes.
Todo este traballo conflúe noutra preocupación, a económica. Mentres as súas homólogas vascas e catalá reciben tres e case nove millóns, respectivamente, dos seus gobernos autonómicos, a galega «sobrevive» cun millón en todas as achegas. «Estamos en precario», recoñece Freixanes, sen deixar de advertir de que cos escasos recursos dos que dispón a entidade non se desmerecen as expectativas depositadas nela.