Tres olladas á poesía de Xela Arias e a música dos seus versos centrou o simposio da RAG

A Real Academia Galega celebrou este xoves a segunda sesión do simposio que a institución dedica a Xela Arias. Foron tres olladas á súa poesía, as das escritoras Chus Pato e Alba Cid, xunto coa crítica literaria María Xesús Nogueira, que participaron nunha mesa redonda moderada por Mercedes Leobalde. Non foi a única ocasión para abordar os seus versos, xa que se puideron escoitar nas versións musicais da Banda da Loba, que no seu último disco, Hasme oír, converteu en cancións algúns dos poemas da escritora homenaxeada co Día das Letras Galegas.

Nogueira analizou a visión da escrita de Arias a través de reflexións que deitou en conferencias ou entrevistas. «As reflexións que sobre a poesía foi deixando ao longo do tempo en soportes diversos permiten a reconstrución dun discurso metaliterario que non só define claves da súa poética senón que a sitúa nunhas coordenadas estéticas e ideolóxicas», explicou. Outras cuestións que se abordaron na mesa foi a súa percepción como feminista, ao tempo que amosaba a súa desconfianza das etiquetas: «Dáme rabia ter que dicir que son feminista. Pásame igual que co nacionalismo. Deixarei de ser unha cousa e outra cando as nacións soxulgadas non o sexan e as mulleres discriminadas non o estean», escribiu Xela Arias.

A visibilidade e recepción da súa obra foi o tema abordado por Chus Pato, quen cre que foi «escasamente lida» nos anos nos que se publicou. «Hai obras que tardan en acadar a lexibilidade e este parece ser o destino dos libros da nosa autora. Os poemas de Xela Arias foron sempre dialéctica en repouso, pero é agora cando ao achegarnos a eles comprendemos a marca do cognoscible, do que xa na súa liberalidade podemos ler porque entre esta escritura e nós xa non existe continuidade», afirmou a poeta e tamén académica.

Doutra xeración é Alba Cid, quen percorreu as coordenadas culturais de Xela Arias, deténdose especialmente nos anos 80, «en que se esboroan moitas das loitas contraculturais ensaiadas nas décadas precedentes». Cid convidou a repensar a situación de Arias nun marco xeracional e superar inercias que máis que situala na historia da literatura acaban por agochala.

A segunda sesión do simposio abriuse cunha intervención do presidente da RAG, Víctor F. Freixanes, e unha lembranza de Darío Xohán Cabana.

---

---

---