O dúo lanzou o seu primeiro sinxelo e anuncia varios epés este ano
01 feb 2025 . Actualizado a las 15:55 h.Podíase dicir iso do segredo mellor gardado da música galega, pero a aventura sonora de Aida Tarrío e Raül Refree xa era un ruxerruxe que andaba dun lado para o outro no ambiente musical desde hai meses. Ela forma parte de Tanxugueiras, un grupo que transcendeu o musical no 2022 para converterse en todo un fenómeno social. Xunto á música, tamén participa en proxectos de danza. El, ademais de autor dunha ampla obra ao seu nome, é a persoa que estivo man con man en proxectos claves na música ibérica, como Granada (2014) con Silvia Pérez Cruz, Los Ángeles (2017) con Rosalía, Manual de cortejo (2019) con Rodrigo Cuevas e Lina_Raül Refree (2020) coa fadista lusa Lina. A unión de ambos está chamada a marcar un fito.
O proxecto chámase Gala i Ovidio e rende homenaxe no seu nome aos fillos xemelgos que Rosalía de Castro tivo en 1871. Hoxe fíxose público co lanzamento dun sinxelo, De maio a abril. Adianta unha serie de epés que sairán durante este ano. Recollen o cancioneiro elaborado entre ambos durante o ano e medio que levan traballando xuntos. A peza bota a andar a súa melodía circular sobre un sofisticado enxame instrumental que mestura o acústico e o electrónico. Sitúa o tema nesa liña de tradición, modernidade e experimentación tan típica da obra de Refree. Chama a atención a interpretación de Aida, suave e contida, sen os picos de expresividade habituais de Tanxugueiras. Tamén os cambios dunha canción sorprendente e imprevisible que atopa o seu clímax cando no retrouso di: «Preguntáchesme aquel día / Díxenche que non sabía /Esa foi miña fortuna».
Segundo indica a produtora Playplan na nota que acompaña o lanzamento, o tema supón «unha reafirmación da propia personalidade e maneira de ser fronte ás crises de identidade que nos axexan neste mundo dominado pola imaxe e o que dirán». Nese sentido, sinalan que a peza aposta pola reafirmación das conviccións persoais fronte á presión do pensamento único. E falan de influencias tan dispares como Oneothrix Point Never, Kanye West, Dorothé Schubarth e, por suposto, o arquivo sonoro tradicional galego.
Orixe en 2021
O xerme de Gala i Ovidio tivo lugar no ano 2021. Daquela, Raül Refree participou no pazo de Mariñán de Bergondo nunhas sesións con artistas como Caldo, Oîma, Caamaño & Ameixeiras e tamén Tanxugueiras. Entón, dicía nunha entrevista publicada en La Voz: «Escuchas a Tanxugueiras cantar y es como si no hubiera mañana. Eso me parece flipante, porque es una manera de entender la música que a mí me interesa mucho».
Naqueles días, o músico e produtor catalán non só coñecía de primeira man a música galega de raíz do momento, senón que atoparía a voz definitiva para un futuro proxecto. Di que Aida ten na súa gorxa a todas as mulleres galegas dos últimos decenios. E precisamente este arraigamento permitiulles experimentar xuntos, sen perder nunca a áncora co territorio e a identidade. O resultado verase en capítulos durante o 2025.