Alonso Montero doa á Fundación Penzol documentos relacionados coa súa faceta como orador

«Son páxinas faladas», dixo Carmen Blanco Ramos, transcritora das 69 locucións de conferencias pronunciadas, entre os anos 2014 e 2018, por Xesús Alonso Montero e doadas por ela e o académico á Fundación Penzol. Carmen Blanco Ramos fixo as transcricións dunha maneira fiel á forma de falar do escritor, e engadiulles información adicional, como a data, o lugar ou o público ao que ían dirixidas. Catorce dos discursos recollidos na relación están publicados no libro Palabras para o noso tempo (Alvarellos, 2024), en edición de Olivia Rodríguez, que tamén publica un estudo dos discursos recollidos no volume, que, ademais, conta con textos preliminares de Alonso Montero e Carmen Blanco.

A esta doazón únense 31 guións de conferencias desenvolvidas por Alonso Montero entre os anos 2004 e 2024. Algúns destes guións, segundo dixo Alonso Montero, son «chuletas feitas en panos de mesa cinco minutos antes das conferencias». A Fundación Penzol, a través do seu presidente, Manuel Puga, comprometeuse a custodiar, coidar e poñer o material á disposición dos investigadores.

---

---

---