O Camiño de Santiago incorporará experiencias de realidade aumentada grazas a unha aplicación desenvolvida en Galicia
CULTURA
O Centro de Investigación en Tecnoloxías de Telecomunicación da Universidade de Vigo participa nun proxecto que busca potenciar o acceso a contidos 3D sobre o patrimonio cultural europeo
28 jul 2025 . Actualizado a las 20:22 h.O Centro de Investigación en Tecnoloxías de Telecomunicación (atlanTTic) da Universidade de Vigo (UVigo) está a participar no proxecto europeo 3DBigDataSpace, que busca potenciar o acceso, visualización e contextualización de contidos 3D e 4D a grande escala sobre o patrimonio cultural europeo. Un dos fitos destacados do proxecto consistirá no desenvolvemento dunha experiencia de realidade aumentada para o Camiño de Santiago e o Camiño a Roma mediante unha aplicación multiplataforma que se levará a cabo desde atlanTTic.
«Esta ferramenta permitirá que os peregrinos accedan a contido enriquecido mentres realizan a ruta, mellorando a súa experiencia cultural e inmersiva», detallan Silvia García Méndez e Francisco de Arriba Pérez, investigadores responsables do proxecto na Uvigo. A principal finalidade do equipo será deseñar e implementar experiencias 3D e 4D baseadas na localización, co fin de guiar os peregrinos ao longo das diferentes rutas destes dous camiños. Esta solución permitirá incorporar elementos de realidade aumentada que contextualicen o patrimonio in situ, mellorar a experiencia dos usuarios mediante contido dixital adaptado ao seu percorrido e fomentar o uso de tecnoloxías inmersivas en contornos culturais, tanto urbanos como rurais.
Os investigadores sinalan que «estas ferramentas están pensadas para beneficiar a un amplo abano de usuarios, tanto cidadanía en xeral que poderá acceder a contido 3D e 4D das súas cidades, como peregrinos e turistas que poderán gozar de experiencias culturais inmersivas en rutas históricas, así como institucións culturais que disporán de novos medios para presentar o seu patrimonio de forma innovadora e accesible, e mesmo administracións locais e empresas tecnolóxicas que poderán aplicar estas solucións en ámbitos urbanos e rurais». Parte do desenvolvemento destas aplicacións estará pensado para funcionar en contornas con baixa conectividade co fin de garantir o acceso aos contidos en zonas rurais, un aspecto clave para a inclusión territorial e a democratización tecnolóxica.