«A miña incorporación a Madrid non irá en detrimento do que se fai na Estrada»

Juan Constenla (A Estrada, 1964) será deputado no Congreso polo PP trala renuncia de María Ramallo. Poucos días despois de coñecer o seu salto á política nacional, este inxeniero técnico agrícola repasa a súa traxectoria na política.

-Cando entrou en política activa?

-Foi no ano 2011, cando José López foi elexido alcalde. Antes tiña ido en listas municipais, pero foi nese ano cando entrei como concelleiro. De xeito orgánico cara o 2007 fora nomeado presidente da xestora do PP na Estrada, e no congreso do 2010 José López fora elexido como presidente e eu secretario xeral.

-Que o levou a involucrarse na política?

-Sempre tiven inquedanzas por facer cousas polo noso pobo e tamén me motivou o equipo humano que había. Sobre todo con José, que ademais dunha amizade persoal, fomos da man cando nos plantexamos retomar o partido trala perda da alcaldía no 2007 e o peche da etapa de Ramón Campos. Traballamos ata reorganizar o partido e chegar ata o que é hoxe, despois de nomear candidato a López e acadar a alcaldía.

-Sempre foi un fixo nos gobernos de López Campos.

-Sempre fun primeiro teniente de alcalde, e sempre coas concellerías de Obras e Servizos no Rural, Medio Ambiente, Cultura e Normalización Lingüística.

-Dende a oposición consideran incompatible as súas responsabilidades municipais con ser deputado no Congreso. Como o ve?.

-Neste momento a situación é un pouco rara. O traballo en Madrid por videoconferencia permitirame compaxinar ese traballo co da corporación. E logo, no departamento de Cultura, moi activo na Estrada e envexable por moitos concellos das nosas características, conto cun equipo fundamental, cos técnicos de Cultura, que son quen en realidade organizan todas as programacións e actos, co que non sería complicado de levar. En canto a Rural e Obras trataremos de levalo, e se non tamén teño ademais do equipo dese departamento a todos os compañeiros de goberno que estamos traballando todos a unha para que non se note a miña falta física na Estrada. Pouco a pouco haberá que ver como vai discorrendo a situación. O que podo asegurar e transmitir a toda a cidadanía é que a miña incorporación como deputado en Madrid non irá en detrimento de todo o que se fai na Estrada e do que queda por facer. Non quedará abandonado o rural nin as obras.

-Esperan logo a ver como se concilian na práctica a política local e a nacional.

-Se hai que facer alguha modificación ou adaptación, por suposto que se fará.

-Unha demanda clara é a variante da Estrada, ten xa máis cousas en carteira?.

-Agora mesmo estou aterrizando e preparando. Como estradense a variante é unha das reivindicacións que temos de hai moitos anos. Compartirei as demandas da Estrada coas de toda a provincia, xa que son deputado de toda Pontevedra e sobre todo de Tabeirós, Terra de Montes e Deza. Alí traballarei con Diego Gago e Javier Bas para presentar todas as demandas e pelexalas pola provincia.

-Como coñeceu o nomeamento?

-Por unha chamada de Alfonso Rueda dende o partido, para comunicarme a decisión de María Ramallo de dimitir para centrarse na alcaldía de Marín.

-E como o recibeu? Responsabilidade, alegría, orgullo?

-Un pouco cunha mestura de todo: orgullo, responsabilidade, inquietude por saber o que me vou atopar nesta nova etapa en política que me toca vivir. E a responsabilidade de facer un bo papel, despois do listón tan alto que deixa María Ramallo. Tratarei de non defraudar a ninguén e facer as cousas o mellor posible. Non estarei só, como xa dixen formarei parte dun equipo que xa está asentado en Madrid, e traballarei con eles cóbado con cóbado para conseguir todo o mellor.

---

---

---