Lois García Carballido, PSOE Ponteceso: «Levo tres anos sen un día de vacacións»

Para o socialista Lois García Carballido esta é a cuarta vez que se presenta como candidato á alcaldía de Ponteceso. Rexedor dende xuño de 2015, intentará manter o bastón de mando nun municipio con sete forzas en liza. Pero este docente de profesión ten claro que os veciños apoiarán, de novo, a súa xestión o vindeiro 28.

—Como afronta estes comicios?

—Con máis gañas que nunca de continuar este traballo en favor de Ponteceso, a pesar dos atrancos e as navalladas que lles meteron aos veciños os partidos da oposición. Este Concello vai despegar, vai como unha locomotora do AVE. O único que precisa é un goberno que aporte estabilidade, e esta estabilidade so vén da man do PSOE.

—Este foi un mandato moi complicado a nivel institucional.

—Os partidos da oposición intentaron arruinar este Concello, afortunadamente non o conseguiron. Seguimos en pe e máis ilusionados ca nunca, con case seis millóns de euros en obras neste mandato. Pero esta oposición foi a que fixo que Ponteceso perdera 4 millóns de euros. Rexeitou un plan de 2 millóns de euros dunha subvención para o cambio de alumeado público, que ademais reducía a factura anual en 300.000 euros e o mantemento do servizo noutros 60.000. Esta oposición foi a que rexeitou o POS, foi a que rexeitou o plan de pago a provedores. Tivo que vir o delegado do Goberno para garantir os pagos das facturas aos autónomos. Esta oposición foi a que puxo prezo ao seu voto, a que retirou os soldos políticos, a que dixo que se o alcalde dimitía aprobaba o Plan de Obras e Servizos. A que intentou, sen éxito, unha moción de censura. Unha oposición á que non lle importou os veciños, porque ata chegou a rexeitar un plan social de emprego a persoas en risco de exclusión social e laboral. Os veciños teñen agora a oportunidade de valorar todo isto e farano, seguro. O que fixo o PP non ten nome: votar en contra do POS ou de dicir que o aprobaba se o alcalde dimitía. E pese a todo temos un concello con 2,2 millóns de euros de remanente positivo.

—Son sete partidos os que concorren as leccións. É o resultado dunha crise institucional sen precedentes en Ponteceso?

—Os veciños queren un proxecto estable, unha cabeza visible. Non queren xente que poña prezo ao seu voto. Pese a todo, nestes catro anos fixemos máis con menos:. Puxemos en valor as festas gastronómicas, das mellores de Galicia, ao igual que o Festiletras. Fixemos obras, como a que agora imos comezar coa primeira fase da traída de Langueirón. Ponteceso merece unha estabilidade e o PSOE é o partido que pode garantila. Eu podo dicir que traballei en favor de Ponteceso e dos veciños. Levo tres anos sen un día de vacacións, pero digo orgulloso que acadamos moitas cousas nestes catro anos. Puxemos en marcha o primeiro proxecto de aluguer de naves con opción de compra no polígono de Tella e agora outorgamos outras dúas licencias para outras tantas naves no polígono. Conseguimos a primeira oficina dixital de empresas do rural da Deputación na provincial grazas a un investimento de 400.000 euros.

—Se non acadara unha maioría absoluta, con quen pactaría?

—Xamais pactaría con xente que lle puxo prezo ao seu voto.

—Cal é a súa gran aposta para os vindeiros catro anos?

—A residencia dos maiores será unha realidade grazas a que se conseguiu o ciclo de atención sanitaria para o instituto de Ponteceso.

---

---

---