Que faría se fose alcalde | Diego Ameixeiras, escritor: «Apostaría polo modelo sen coches para Ourense»

No eido da literatura galega Diego Ameixeiras xa ten demostrado ser unha das figuras mais relevantes do momento. Este mestre da novela negra —como volveu quedar de manifesto en O cervo e a sombra (2021)—, deixa agora a un lado a narrativa e métese no traxe do alcalde de Ourense. Pero aí a primeira idea que lle sae ten que ver directamente cos libros: «Crearía unha verdadeira rede potente de bibliotecas municipais, que haxa unha en cada barrio para o gozo dos veciños. Un modelo como o que hai na Coruña, por exemplo».

Canda iso, Ameixeiras considera que deben equilibrarse os orzamentos para potenciar todo o que ten que ver con servizos sociais: «Hai que insistir nese tipo de políticas para que todos os veciños teñan resoltas as súas necesidades básicas». Se miraba ao norte para o tema das bibliotecas, a ollada baixa ata Pontevedra para a mobilidade: «Apostaría para Ourense polo modelo sen coches como que teñen alí, que sexa unha cidade ao servizo dos peóns e menos dos coches». Facer peonil a rúa do Progreso? «No sei se será posible, pero non estaría mal se o fora», ri.

«Creo que é moi necesario un plan integral de recuperación do casco histórico», engade Ameixeiras. «Nos últimos anos sufriu un baixón considerable, sobre todo a zona que vai dende o Concello ata o Posío. Habería que facer un plan de recuperación do comercio local e dos edificios para revitalizar a zona, que está bastante deixada». Esa medida concreta acompáñase doutra más xeral: «Máis zonas verdes e máis arbores. Creo que, en xeral, hai poucas árbores, sobre todo polos barrios. Tería que facerse unha humanización xeral de ampliar beirarrúas e plantar moitos novos».

---

---