Antonio Lara: «Non se pode ser condescendente cos que falan de independencia para Galicia»

Mercedes Moralejo

Nado en Barcelona (1980), un aval en Ciudadanos, Antonio Lara, cabeza de lista do partido de Albert Rivera por Pontevedra, entra na política dende a asesoría en dereito bancario e a xestión patrimonial. Tentouno o 20D, e agora volve coa idea de controlar un posible novo goberno de Núñez Feijoo. «En galego», pide, para romper a imaxe estatalista que pesa sobre C’s.

-Asesore. ¿Se tivera 2.000 euros aforrados onde tería que investir?

-Sempre hai que pensar no longo prazo. As inversións flutúan e o horizonte temporal da unha medida máis clara. O aforro debe enfocarse ás necesidades futuras.

-¿Ciudadanos que sería: un fondo variable ou fixo?

-Mixto. Incorporamos medidas moi progresistas nuns eidos e outras máis típicas do liberalismo.

-Un goberno que condicionasen vostedes, ¿que faría cos impostos?

-Racionalizar os recursos e reducir ao mínimo posible o gasto político, sen baleirar as institucións claro, e dedicar eses impostos a dar prioridade aos servizos sociais, o máis sagrado das contas públicas.

-¿Quen lle asesorou para entrar en política?

-Foi un proceso que viña da miña época universitaria. Cando entendín que os políticos non estaban dando solucións lóxicas e necesarias e apareceu Cidadáns, non o dubidei.

-¿Hai espazo en Galicia para a súa proposta de centro... dereita, ou hai aínda que facelo?

-O espazo existe, haino en todos os países europeos, e España e Galicia non son distintas. En Galicia tradicionalmente non existiu ese espazo e Cidadáns chegou para enchelo. Imos entrar no Parlamento porque o respaldo de anteriores comicios di que existe, hai demanda e a nosa xente ten as mans limpas e sen hipotecas.

-Sen hipotecas e sen experiencia.

-Unha cousa é non ter experiencia na xestión pública e outra non ter experiencia profesional na xestión. É compatible.

-¿Non é Ciudadanos un partido de notable control vertical?

-Non, nin é dirixista nin carece de democracia interna. Ao revés, a participación é moi activa. Pero as organizacións políticas deben ter unha xerarquía e unha orde. Unha organización totalmente transversal non funciona, non permite ter directrices, mensaxe...

-A dirección do PP di que Feijoo é o mellor candidato de C’s.

-Nel non vexo os valores que eu quero para un presidente. Dixo que non quería un terceiro mandato e aí está, no noso partido non podería. Non vou dicir que a súa xestión sexa mala, pero ten partes que non nos gustan.

-¿Aínda que un líder estatal de C’s chegase a apuntar a Feijoo como relevo de Rajoy?

-O mal menor é aceptado como un posible ben e por iso non sería vetado na política estatal, pero Cristina Losada faríao tan ben o mellor que Feijoo na Xunta.

-O modelo de Albert Rivera é Suárez, ¿e o seu en Galicia?

-O meu pode ser Albert Rivera.

-Digo en Galicia, ¿ou son de partidos rivais?

-Teño exemplos, pero como temos que mudar a algo mellor prefiro fixarme en Albert Rivera.

-Seu presidente alerta de que en Galicia alguén abra o debate independentista. ¿É para meter medo ou un reflexo catalá?

-Afortunadamente en Galicia polo momento non existe ese risco, pero nós queremos que siga sen existir, que non se cree por alianzas contra natura un problema que non existe. O candidato de En Marea si especula sobre ela abertamente e iso debe ser unha alerta, porque non se pode ser condescendente cos que falan de independencia para Galicia.

-¿Temen que quen defende ditos postulados goberne?

-Non tememos a ningún partido, todos os democráticos son respectables, pero propor cuestións fóra da lei vulneraría a Constitución.

-¿É máis galego ou español?

-Eu síntome de Vigo.

-Xa. ¿E de segundo apelido?

-Fernández-Villamarín.

«Fumei algún porro na época universitaria»

-¿Canto ingresou no 2015?

-Non o lembro con exactitude porque os autónomos non temos unha retribución fixa.

-¿Que patrimonio ten?

-Un coche, pequenos aforros e pequenas posesións materiais.

-¿Fumou un porro algunha vez?

-Si, algunha vez na época universitaria.

-¿Colabora con algunha ONG? ¿Con cales e con canto?

-No pasado colaborei con Acción contra a Fame e con Acnur. Na actualidade, con ningunha.

-¿Cantos libros leu este ano?

-O último foi Hombres buenos, de Arturo Pérez Reverte.

-¿Cantas veces doou sangue este ano?

-Ningunha.

-¿Estivo no paro algunha vez?

-Si, en varias ocasións, pero por períodos curtos de tempo.

-¿Cantos traballos tivo e cales?

-Algúns na época de estudante, dar clases no verán e traballos que non foron relevantes e despois maioritariamente avogado e xestor patrimonial.

-¿Cantas horas durme o día?

-Catro ou cinco.

-¿Fuma? ¿Bebe?

-Non fumo. Bebo ás veces.

-¿Como se chamaba a discoteca da súa vida?

-Liberti en Santiago, e en Vigo, Ferré. Máis que dúas discotecas.

-¿En que animal se reencarnaría?

-Nun cabalo.

-¿A súa materia pendente?

-Ser pai.

---

---

---