«O curso que ven será decisivo para solucionar o tema de Medicina»«Aproximouse a formación superior aos grandes centros de poboación, como A Coruña e Ferrol»

Hai pouco máis de dous anos e medio que colleu as rendas do Reitorado da UDC, pero Xosé Luis Armesto (A Coruña, 1948) leva desde o ano 1989 axudando a construír a institución académica coruñesa, aínda que moito antes xa dirixía o Colexio Universitario da cidade. Considera que nestes vintecinco anos houbo momentos moi bos e outros moi malos, aínda que non perde a esperanza de que a UDC siga medrando.

-¿Que significan 25 anos de Universidade?

-Significan unha satisfacción de estar ao fronte da institución cando cumprimos 25 anos, e unha oportunidade para reflexionar, para poñer en valor as cuestións importantes da institución, e para ver o que podemos mellorar e o que podemos promover.

-¿Houbo épocas mellores e peores?

-Estes vintecinco anos foron anos de progreso continuo en temas de infraestruturas, de cualificación do profesorado, e de expansión da oferta universitaria; pero, quizais, esteamos vivindo nestes últimos anos as situacións máis duras e máis críticas da Universidade en xeral, e tamén da Universidade da Coruña.

-Historicamente, a UDC sempre estivo por detrás de Santiago e de Vigo en tema de presupostos e infraestruturas. Esta situación foi a peor coa crise.

-Eu defendo, defendín e defenderei o sistema universitario galego. É verdade que temos tres universidades e estamos celebrando este vintecinco aniversario, pero o importante é fortalecer e promover a cooperación das tres universidades, e traballar como sistema universitario galego, que por outra parte, por lei estamos obrigados a elo. Porque cando se crean as universidades da Coruña e de Vigo tamén se elabora a lei do sistema universitario galego. Polo tanto, temos que traballar en clave de sistema universitario galego, porque somos un país moi pequeno nun mundo globalizado e temos que traballar conxuntamente. Ese é o camiño que debemos seguir, o de colaborar, cooperar e promover o sistema universitario galego. Se o facemos así, nos irá moito mellor.

-¿Que tal co novo reitor de Santiago?

-Ben, ben. A relación xa era boa co reitor de Santiago, e penso que vai a ser tan boa ou mellor co novo reitor da Universidade de Santiago.

-¿Solucionarase o problema de Medicina?

-Algún día terá que solucionarse. A solución que poñemos sobre a mesa é a máis adecuada e a máis intelixente, que é colaborar e cooperar, e temos que asinar un convenio coa Universidade de Santiago, para que Vigo e A Coruña poidamos colaborar na docencia do grado de Medicina

-Xa, pero ese convenio se ven retrasando moitos anos.

-Eu levo dez anos traballando neste tema, e sigo perseverando nel.

-¿Hai algún horizonte onde se vislumbre unha solución?

-Como para case todo, cada vez queda menos. Eu penso que pode ser decisivo o curso que ven. Creo que estamos no bo camiño.

xosé luis armesto reitor da universidade da coruña

-O Goberno di que a crise se está acabando, pero os recortes seguen vixentes.

-O coherente sería que levantase as restricións, porque nos están afogando, economicamente e coa taxa de reposición para poder renovar e rexuvenecer o cadro de persoal e incorporar xente nova que aporte novos valores á institución. O Goberno ten que ser coherente, se de verdade a situación non é tan mala, que nos levante as restricións que temos, que son moi malas, que son financeiras e de organización. Non nos deixan, dentro do límite de gasto, ser autónomos, e precisamos una autorización da Xunta para os contratos temporais. Nestes 25 anos non recordo nunca que houbera esta falta de autonomía universitaria e de financiamento.

-¿Como se presenta o futuro coa caída dos alumnos?

-Estes días se publicaban as notas de corte, que soben en todas as titulacións e en todas as universidades, o que quere dicir que cada vez hai maior interese por formarse, por ter unha formación cualificada. Eu entendo que a xente nova e as familias teñen claro que estamos na sociedade do coñecemento, e o valor de hoxe e de futuro é o coñecemento.

-Pero o ministro de Educación di que agora hai que pagar a carreira, e custa sobre 9.000 euros.

-Non só hai que convencer ao ministro, senón á sociedade en xeral, do valor da Universidade pública e de que os seus fillos poidan estudar con unas taxas relativamente baixas. Por iso, foi tan importante a creación da UDC e destes 25 anos, porque aproximou a formación superior aos grandes centros de poboación, como A Coruña e Ferrol.

---

---

---