Narón, o máis desexado: todos queren facerse co feudo de Terra Galega

Todo o mundo quere gobernar Narón. A campaña neste concello amósase case máis intensa que en Ferrol. Por un lado, Terra Galega quere manter este feudo no que manda desde o inicio da democracia. E por outro, a oposición amósase combativa para evitar a maioría absoluta de TeGa. E como guinda do pastel, irrumpiu na campaña o exalcalde Xoán Gato: pero non para apoiar aos seus antigos compañeiros, senón ao PSOE. A corporación naronesa está formada por 21 concelleiros. Terra Galega conta actualmente con dez edís, o PP con seis, PSOE dispón de tres e BNG de dous. Goberna Terra Galega en solitario, despois da dimisión dos edís socialistas o pasado 3 de abril. Segundo os últimos datos do INE, Narón ten 39.049 habitantes.

Marián Ferreiro (Terra Galega): «Narón é industrial e tamén humano»

Destaca o «orgullo» desta cidade e non lle sorprende a irrupción de Gato

Marián Ferreiro (San Xiao, Narón, 1977) loitará polo doceavo mandato consecutivo da súa formación neste concello. Todo un récord que pretende bater Terra Galega. A actual rexedora só quere a maioría absoluta. E define Narón como «a mellor cidade para vivir».

—Todo o mundo ambiciona facerse con Narón?

—Entendemos que somos o obxectivo, que todos queren gobernar Narón e que está sendo unha campaña bastante dinámica.

—Por que a súa formación debe seguir gobernando desde o inicio da democracia?

—Porque somos a mellor candidatura e con experiencia demostrada. Un non aprende a gobernar Narón en dous días. Temos un bo equipo, e un programa ambicioso, moi ilusionante e sobre todo realista. Queremos seguir coa transformación deste territorio.

—En que consiste o orgullo de Narón da súa campaña?

—Porque estábamos destinados a outras cousas pero fomos capaces de conseguir todo o que temos: oportunidades, gañar poboación, un orgullo de pertenza aínda que non nos regalasen nada. Cambiamos o rumbo do concello.

—Intentou mudar a súa imaxe a un concello máis turístico?

—Narón é industrial pero tamén humano. Somos o motor económico da comarca, con 237 novas empresas. Pero queremos un concello máis accesible, ata a oposición recoñece que os nosos parques están ben. Temos un gran nivel cultural e deportivo. E a nivel turístico, puxemos en valor o muíño de Xuvia e faremos o mesmo co das Aceas. E potenciamos o Camiño Inglés con esas letras no paseo de Xuvia.

—Que sentiu cando Xoán Gato irrumpiu en campaña co PSOE?

—A verdade é que non me sorprende. Xa o fixo en máis ocasións. Cada catro anos aparece cun grupo diferente: foi con Coverxencia Galega, co PP de Miguel de Santiago. En Terra Galega estamos máis unidos que nunca, marcharon tres persoas e unha delas era el.

—Pero non se levaban ben?

—A relación era boa, non mala. Non de chamadas diarias, pero si falamos no muíño de Xuvia. Pero non me sorprende o que pasou.

—O machismo apárcase en campaña?

—Hai moitas cousas que mellorar, pero imos avanzando.

—O PSOE non pactará con TeGa.

—Nós traballamos para ter maioría absoluta. Temos o aval do feito en catro anos a pesar da pandemia e do encarecemento de prezos pola guerra, coa maioría dos compromiso cumpridos.

—Vostede tamén quixo facer de Narón un concello para pasear. Que sinte ao camiñar por el?

—Teño o defecto de ser moi crítica e perfeccionista, sempre saco defectos. Pero dá gusto pasear pola nova senda peonil, queremos ser referente en humanización.

Germán Castrillón (PP): «Este concello leva dez anos de parálise total e non hai proxectos atractivos»

Lamenta que o goberno local «fale de inversións pero todos os proxectos marchen a Somozas ou As Pontes»

Germán Castrillón (1959, As Pontes) deixou a alcaldía de Cabanas en 2019 para loitar co PP pola de Narón, «a cidade onde vivo e onde quero que os veciños estean cos mellores servizos».

—En 2011, o PP empatou en concelleiros con TeGa. O obxectivo é regresar a ese resultado?

—O obxectivo é gañar as eleccións, co máximo número de edís posibles.

—É un concello moi apetitoso para o PP?

—Claro que é un concello interesante, eu traballo desde 2019 para chegar con posibilidades a 2023. É necesario un cambio porque a alternativa de TeGa está esgotada, non ten ideas.

—Valeu a pena deixar Cabanas para loitar por Narón?

—Si que valeu, sempre vale a pena porque eu son do partido e se me di que loite por Narón eu encantado. En Cabanas estiven doce anos que é un tempo suficiente para permanecer na alcaldía. Por hixiene política non podes seguir moito tempo nun posto, e Narón necesita un cambio.

—En Narón a xente quixo que sempre gobernase o mesmo partido.

—O cambio é máis necesario que nunca porque este concello leva dez anos en parálise total por este goberno. Non hai proxectos atractivos nin interesantes.

—Que lle din os veciños?

—Que o goberno está paralizado e sempre se coloca de perfil, que sempre bota a culpa a outras administracións e é incapaz de resolver as papeletas.

—Para vostede cal é a peor área?

—Dúas áreas destacan polos seus erros diarios. En servizos sociais, somos o segundo concello da provincia con máis lista de espera en dependencia. En obras, só hai propaganda como a piscina do Couto mentres non se consigue sacar o PXOM a aprobación inicial. Tamén presume de ser un concello industrial polos tres polígonos, pero leva trece anos sen instalarse unha empresa de importancia. Fálase de inversións pero todos marchan a Somozas ou As Pontes.

—Parece que os pactos serán máis difíciles desta vez.

—O noso pacto é cos veciños.

Jorge Ulla (PSOE): «Non pactaremos con TeGa, aquí vimos a mover as pezas»

Afirma que a entrada de Gato foi «un golpe de efecto que será clave no resultado electoral»

Jorge Ulla (A Coruña, 1982) reside en Narón desde hai doce anos e preséntase por primeira vez polo PSOE: «Este é o meu fogar, onde quero que os meus fillos vivan e traballen».

—Deu a badalada coa incorporación de Xoán Gato á campaña?

—Foi un golpe de efecto que será clave no resultado electoral.

—Achegouse vostede a el?

—Coincidimos nunha charla, el segue moi atento á política municipal. Díxenlle que estaba interesado en que me acompañase e estoulle moi agradecido.

—O PSOE xa di que non pactará con TeGa para formar goberno.

—Na política municipal, é novo que un partido amose a súa intención desde o inicio. Non pactaremos con TeGa para formar goberno. Vimos a mover as pezas.

—Iso non beneficiará ao PP?

—Beneficia ao PSOE, a forza máis votada en Narón nas xerais e autonómicas. Queremos diferenciarnos de TeGa que non ten ideoloxía, recuperar o voto socialista para que non opte pola marca branca.

—Deixaron o goberno.

—Foi decisión orgánica, trasladei a miña petición ás executivas municipal e provincial. O pacto escurecía as políticas de esquerdas.

—Que bota en falta en Narón?

—Un perfil institucional de alcalde, que debe moverse para atraer a novas empresas.

—Entra a axitar a política local?

—Quero pegar un golpe no taboleiro para mover as pezas postas desde hai 40 anos. Narón está esgotado e debe entrar no XXI.

—Non é arriscado?

—Non é dogmático facer cambios a cinco meses das eleccións, pero rompemos a liña pactista porque saímos a gañar.

Olaia Ledo (BNG): «O BNG non se pon chanzos e está aberto a dialogar»

Olaia Ledo (1981, Corcubión) preséntase polo BNG: «Narón é o meu fogar e Xuvia o mellor lugar do mundo».

—É unha campaña intensa?

—Si, as campañas sempre son interesantes e o BNG asume con moita ilusión ter un Narón para todos e todas a partir do 28 de maio.

—Con que obxectivos traballan? Queren entrar no goberno?

—Sabemos que subiremos en concelleiros tal e como calculamos, coa nosa acción de goberno revolucionaremos o concello. Non quixemos entrar hai catro anos e vimos catro anos de inmobilismo. No diálogo está todo, pero nós queremos un concello BNG.

—Pero están abertos a entrar?

—Non diría tanto, os gobernos en minoría funcionan como amosou Pontevedra como amosou desde 1999 para transformar a realidade. O BNG nunca se pon chanzos, estamos abertos a dialogar e a ofrecer a nosa proposta. Quen se convenza de que o noso proxecto pode ser unha realidade, aí estará o Bloque.

—Quedaron convencidos coa súa decisión en 2019 de non entrar no goberno?

—Moito. Estes catro anos non valeron para Narón, non se fixo un proxecto. Víñamos de contas saneadas polo BNG e non se investiu no necesario. Hai 12 millóns de euros en remanentes porque non invertiron no prometido.

—O PSOE di que non pactará con TeGa. Iso presiona ao BNG?

—Para nada. Somos alternativa de esquerdas a un PSOE con leas internas e un TeGA inmobilista, a xente pode votar por nós con ilusión. 

—Que piden os veciños?

—Que se descentralicen os servizos públicos, un mellor transporte (porque en Narón é complicada a vida sen coche) e políticas de igualdade.

—A súa campaña é en feminino?

—Somos feministas e ecoloxistas, e iso o aplicamos dun xeito transversal en todas as nosas políticas para ter unha sociedade máis xusta. 

---

---

---