O Chanfaina Lab de San Sadurniño outorgará o premio honorífico Bernardino de Lamas, na honra do ferrolán Alfonso Piñón Teixido

Bernardino de Lamas, un dos pseudónimos do articulista Alfonso Piñón Teixido (Ferrol, 1887-Madrid, 1973), dará nome ao galardón honorífico que outorgará o Chanfaina Lab de San Sadurniño por primeira vez este ano. Será o día 15, na gala na que se proxectarán as películas gravadas na última fin de semana de setembro polos participantes no certame audiovisual. O primeiro premiado será o realizador, escritor e profesor ourensán Alberte Pagán, segundo o Concello, organizador.

Piñón Teixido foi «escritor, membro do Partido Galeguista e amante da paisaxe, especialmente da do val de Lamas», explican. De aí lle vén o nome de Bernardino de Lamas, que intercalou co alcume Luis de Narahío. Del destacan a faceta de promotor cultural —«foi o principal impulsor do monumento ao camiñante descoñecido, en Barallobre»— e a cineísta, xa que «filmou case 300 bobinas cinematográficas nas viaxes por Galicia entre 1924 e 1935».

Consérvanse 90, de excursións, romarías ou procesións, «cun grande valor patrimonial, etnográfico e histórico», subliña Manolo González, profesor e artífice do Chanfaina Lab, e autor da biografía de Piñón, «a piques de publicarse». «É un exemplo do cineasta amador que filmaba sen intencionalidade documental, só para conservar o momento e revivilo», recalcan. «A súa figura conecta por esta razón coa esencia do Chanfaina Lab, como encontro que foxe das estruturas e formas narrativas da industria, pero tamén pola súa vinculación con Lamas, o Pico de Ferreira e Naraío, que Piñón consideraba o seu «país» de adopción», remarcan desde o Concello.

Da última edición do Chanfaina Lab saíron .

---

---

---