O sindicalista considera desexable que o alcalde o seu equipo «practiquen máis as ideas nas que din que cren»
04 oct 2013 . Actualizado a las 07:00 h.A xunta de persoal do Concello de Oleiros é un organismo cuxo presidente, Xerardo García García (Oleiros, 1964), non recibiu precisamente aplausos nos últimos tempos desde o goberno local. As súas críticas en asuntos como o reparto da produtividade ou das axudas sociais aos traballadores non sentaron precisamente ben na alcaldía.
-¿Que pasou co debate das axudas sociais aos funcionarios?
-O noso desencontro co goberno local nese tema foi, primeiro, que non se convocou a mesa de negociación colectiva. Ademais, o cambio que se fixo foi retroactivo, e non é lóxico cambiar as regras de xogo a posteriori. É como amañar un partido.
-¿É boa a organización laboral no Concello de Oleiros?
-É mellorable, pero non é mala.
-¿En que é mellorable?
-Sería necesario acabar con situacións de agravio comparativo, como o reparto da produtividade, e igualar os niveis salariais co entorno.
-¿Cóbrase menos en Oleiros?
-Non, pero os niveis profesionais non son semellantes. Cada traballador pertence a un grupo e se algún día se pode concursar a outros concellos, a nosa categoría, no papel, é menor.
-Leva tempo pedindo que no Concello teñan en conta aos sindicatos.
-Sería desexable que os nosos gobernantes practicaran máis as ideas nas que din que cren. Aquí non hai negociación colectiva, si individual. A política de cara á galería é de monumentos e rúas a sindicalistas e políticos de esquerdas. Sería máis correcto que iso se practicara dentro do Concello, como seguramente dirían Carrillo ou Sampedro.
-Vostede é representante dos funcionarios, sen embargo o alcalde mantén que obtivo tan poucos votos que non representa a ninguén.
-En Oleiros hai xente con medo, non hai liberdade. Nas últimas eleccións á xunta de persoal non se presentou ninguén. O panorama de maioría absoluta de Alternativa impón. O alcalde non ten precisamente un perfil negociador, e nese aspecto si sería mellorable a política laboral en Oleiros. Semella que aquel que discrepe co rexedor é malo e que o que está de acordo é bo, e nós non perseguimos ser bos nin malos, só cousas razoables. Con nós métese porque non coincidimos con el.
-¿Que obxectivos pretende?
-Queremos unha reforma da Administración, aquí e en Galicia. En Oleiros non existen concursos. Hai postos que desempeña algún non se sabe por que e hai diferenzas que responden máis ás persoas que ao perfil profesional, e iso non é lóxico.
Xerardo García presidente da xunta de persoal de oleiros