O Festival Surfing the Lérez, en Pontevedra, terá un cartel con grande peso das propostas orientadas ao rock and roll e á nova xeración musical galega
24 jun 2022 . Actualizado a las 05:00 h.Corenta artistas e grupos pasarán nesta edición polos tres escenarios do festival Surfing the Lérez, en Pontevedra. E todos, absolutamente todos, son galegos. Non é casualidade nin froito dun descarte. Sinala Marcos Rivas, organizador do Surfing: «Tras dous anos de parón, tiña clarísimo que esta edición tiña que ser cen por cen representativa da escena musical galega. Se os que temos certa visibilidade e poder de convocatoria non o facemos, quen o vai facer?».
Non é esa a única novidade. O Surfing the Lérez incorpora este ano unha terceira xornada. O festival deu comezo onte cunha proposta que combinaba nomes emerxentes da escena urbana, como Wyygga, Uncle Doc & The Homeboys, YNGZ ou Ariezz con outros de sobra coñecidos, como Ortiga, Budiño ou Carlangas.
Pero vaiamos ao que vai acontecer a partir de hoxe. «O venres representa máis a tradición do que foi sempre o Surfing, cun grande peso das propostas orientadas cara o rock and roll. Do que se está a facer agora mesmo en Galicia», explica Marcos Rivas.
As portas do recinto da Illa das Esculturas abriranse ao mediodía para recibir, por esta orde, a Gazela, Heredeiros da Crus (que tocarán á unha do mediodía), O Cadelo Lunático, Fondo Norte, Anxo Araújo, Moura, Ruxe Ruxe, Indy Tumbita & The Voodoo Bandits, Thee Blind Crows e Dismal. Paralelamente, haberá durante toda a xornada un escenario dedicado a DJ polo que pasarán Señora, Kris K, Dinero e Maefield.
A proposta do Surfing para o sábado é, segundo o seu organizador, «unha representación do que é a nova xeración musical galega, con propostas que van do rock ao garaxe, do rap ao trap». Nesa xornada será a quenda de Copa Turbo, Playa Desmayo, Boyanka Kostova, Familia Caamagno, Carlota Crey, Kings of the Beach, Queco Lago, Berto, Elephants & Paw, Cora Velasco, Grande Amore, The Rapants e Terbutalina. O festival contará ademais cun escenario para os grupos da escola Bonobo e outro para actividades infantís.
PONTEVEDRA A ILLA DAS ESCULTURAS VENRES E SÁBADO DE BALDE