«Fun eu quen petei á porta do PP porque o proxecto de José Manuel Baltar paréceme ilusionante»
GALICIA
Eladio Fernández Vázquez situouse onte no ollo do furacán coa súa fichaxe polo PP. Belixerante dende sempre con José Luis Baltar na Deputación e con Elisa Nogueira en San Cibrao das Viñas, con graves acusacións sobre presuntas especulacións urbanísticas e irregularidades no concello onde Eladio Fernández é portavoz do PSOE, foi avalado por Baltar Blanco e Rosendo Luis Fernández, xenro de Elisa Nogueira, para entrar no PP.
-Os seus ex compañeiros aluden a problemas persoais para xustificar o seu pase.
-Non ten sentido ningún e é o máis descerebrado que escoitei na miña vida. Todo o que se fixo foi pola miña vontade e pola miña iniciativa, ninguén me induciu nin me ofreceu nada.
-¿É certo que unha persoa presentou a carta coa súa renuncia dez minutos antes da rolda de prensa?
-Totalmente. Como xa dixen na rolda de prensa, botei moitos anos como militante do PSOE e sempre me impliquei ao máximo, porque me sentía identificado. Foi unha etapa moi boa, na que atopei grandes persoas e amigos, e o lóxico é renunciar á militancia antes de dar a coñecer a miña implicación noutro proxecto político.
-¿Hai, como suxiren os seus ex compañeiros, algún tipo de acordo ou compensación?
-Esa é a típica estratexia para cando queres desprestixiar a alguén, pero neste caso van mal. Ninguén me ofreceu nada nin teño un acordo para nada, fun eu quen petei á porta do PP porque o proxecto de Manuel Baltar paréceme ilusionante e estou convencido de que estamos ante a última oportunidade para sacar a esta provincia de onde está. El ten un proxecto ilusionante e a capacidade de liderazgo para levalo adiante. Daquela, insisto, a iniciativa de entrar no PP foi miña: díxenlle que me parecía un bo proxecto e que, se querían contar coa miña participación, estaría encantado de implicarme.
-No PSOE aluden ao seu fracaso na aspiración de seguir como secretario provincial.
-Nin moito menos. Se tivese aspiracións de seguir como secretario provincial do PSOE presentaría a miña candidatura para optar ao posto, cousa que non fixen. E non é porque sexa moi difícil, porque nunha agrupación como a nosa con 20 avais xa chega, daquela xa me dirá que me custaba presentarme. Se houbese dúas candidaturas non pasaría nada, votaríase e nada máis, pero xa digo que non foi o caso.
-Os seus compañeiros mandáronlle un burofax logo de coñecer a súa fichaxe polo PP para que renuncie ás súas actas ¿Que vai facer?
-Díxeno na rolda de prensa e repítoo agora: as actas de concelleiro en San Cibrao das Viñas e de deputado provincial na Deputación de Ourense son miñas, non do partido, e seguirei a desenvolver o meu traballo como ata o de agora.
-Fálase de transfuguismo e de solicitar a súa declaración como tránsfuga.
-Non é este o caso. Aquí non estamos a falar dunha persoa que deixa unha formación para propiciar un cambio de goberno ou unha moción de censura, non é o caso [o PP ten maioría en San Cibrao das Viñas e na Deputación de Ourense]. Pasarei aos non adscritos, que é o que marca a lei para estes casos.
-Vostede denunciou serias irregularidades en San Cibrao das Viñas ¿Votará agora a favor de Elisa Nogueira?
-Díxeno e repítoo. Entro a militar no PP porque considero que Manuel Baltar conta cun proxecto ilusionante para relanzar esta provincia e como tal militante do PP actuarei apoiando as iniciativas deste grupo tanto no Concello de San Cibrao das Viñas como na corporación provincial da Deputación.