«O PP é tan tolerante coa corrupción como incapaz de resolver os problemas»

-¿Que habería que facer cos concelleiros imputados?

-É necesaria unha modificación para que os comportamentos de corrupción nos concellos teñan o castigo axeitado. E a partir de aí cortar estas prácticas demasiado xeralizadas. Hai demasiados casos que acaban sen ningunha pena. O PP, que pretende dar leccións de ética, é tan tolerante coa corrupción nas súas propias filas, e cos tránsfugas, como incompetente para resolver os problemas dos cidadáns en Galicia, como o paro.

-¿Repetirá o BNG os pactos co PSdeG nos concellos?

-Nós presentámonos coas nosas propostas e os nosos perfís. E despois da campaña hai que ter maiorías para soster gobernos municipais. Cando chegue ese momento, veremos que se fai.

-¿Non teme que as convulsas asembleas para elixir aos candidatos locais lles prexudiquen?

-Eu non comparto que foran convulsas, ou non máis que en outro partido que permita aos afiliados elixir as candidaturas.

-A UPG conseguiu impoñer en moitas desas asembleas candidatos moi pouco coñecidos...

-O mito da UPG é extraordinario. Non o admito. Chegaría á conclusión de que os afiliados do BNG son unha panda de ovellas dirixidas non se sabe por que escuros fíos. A militancia do BNG é madura, con criterio e elixe o que lle convén. Polo tanto, rexeito que a UPG impuxera nada. Incorporamos moita xente nova, o que demostra que o BNG está resintonizando coa sociedade e cada vez máis xente está disposta a sumarse ás listas.

-¿Está o BNG en situación de captar voto desencantado de esquerdas?

-O que temos claro é que calquera elector que se sinta galego e de esquerdas ten o voto útil no BNG. Somos nós os que mantemos en Galiza a posición de esquerda fronte á reforma laboral, á rebaixa das pensións, aos recortes na sanidade, no ensino. Hoxe, un elector de esquerda sabe que o voto útil é o BNG.

-¿Por que son incapaces PSdeG e BNG de poñerse de acordo para facer una oposición forte?

-¿E por que o imos facer?

-Para ter máis forza fronte a un PP con maioría absoluta.

-Somos diferentes. Se alguén lle está plantando cara a Feijoo é o BNG. Podemos falar do financiamento autonómico, de desenvolvemento ferroviario, da caixa... Incluso no decreto eólico, onde se demostrou que o PP mentía para facer un novo concurso e favorecer aos amigos.

-Pero tamén foron capaces de acadar pactos co PP.

-Si, porque o PP foi capaz de chegar a acordos con nós. Cando se separou acabou conseguindo unha situación como na que está agora a caixa, co perigo que ten xa de acabar bancarizada.

-Entendo que no lle satisfai a situación na que queda a caixa.

-Nós fixemos unhas propostas e foron PP e PSOE os que as modificaron para facer unha fusión que non compartimos. En catro meses pasouse dunha fusión viable a un decreto -que apoiaron uns e sobre o que se abstiveron outros- que se fai para vender as caixas a prezo de saldo. Agora hai que ver se se salvan os mobles mentres o presidente da Xunta está de oínte.