A peña Heredeirxs do Celta pide ao club que «garanta a neutralidade política» en futuros actos
GRADA DE RÍO
Desde o colectivo vigués solicitan que se priorice sempre o interese deportivo, mostrando a súa desconformidade co acontecido na presentación de Celta360
12 jul 2025 . Actualizado a las 20:00 h.A peña celtista viguesa Heredeirxs do Celta emitiu este sábado un comunicado en relación ao evento do club do pasado xoves, no que se presentaba a segunda fase do proxecto Galicia Sports 360 e se anunciaba o cambio de nome a Celta360. Rexeitan que o compoñente político cobrase protagonismo en detrimento do deportivo e piden que non se repita. «Pedimos ao Celta que garanta a neutralidade política en futuros eventos e se dea prioridade sempre o interese deportivo», sinalan.
Consideran que se fixo un uso político do evento e amosan a súa desconformidade con que fose así. «O acto foi convocado co ánimo de proxectar os avances e beneficios deportivos, sociais e culturais do proxecto, que se espera que sexa un fito para o club e a comunidade», expoñen. E proseguen afirmando que non están «dispostos a tolerar actos como a intervención da alcaldesa de Mos, Nidia Arévalo, que desviou o evento cara un contido de clara natureza política». «Non era o lugar nin o momento», engaden. Pensan que este comportamento provocou que «o foco se desviase e o importante pasase a un segundo plano».
— Arribada Celeste (@ArribadaCeleste) July 13, 2025
Nas horas posteriores ao evento, xa houbera moitas reaccións a través das redes sociais mostrando o seu descontento co cariz que tomara o acto. Posteriormente ao comunicado de Heredeirxs do Celta foron chegando os doutras agrupacións, caso de Arribada Celeste (Baiona) e as viguesas Colectivo Nós e Marexada Celeste.