A vixésima edición da Festa da Castaña do Courel celebrarase nunha situación un tanto anómala no que respecta á recollida do froito, a causa das peculiares condicións meteorolóxicas deste outono. Cando falta unha semana e media para o festexo, a colleita de castañas na serra está aínda nos seus inicios, mentres que outros anos a campaña xa estaba terminando nestas mesmas datas. «O tempo está moi malo, non choveu case nada e a castaña tarda moito en medrar, aínda que a produción supoño que será a mesma que outras veces», sinala Daniel Arza.
Outro problema que afrontan este ano os produtores locais é que a folla do castiñeiro está comezando a caer antes que a propia castaña, o que pode facer bastante máis traballosa a recollida en determinadas zonas. Este notable retraso na maduración fixo que polo Courel aínda non comezasen a aparecer os compradores que acuden cada ano a abastecerse da produción dos soutos da zona.
Alumnos pregoeiros
No que toca ao festexo gastronómico, o programa segue a mesma liña que a das anteriores edicións. O pregón da feira será preparado e pronunciado por alumnos do colexio público de Seoane. Unha degustación gratuíta de castañas asadas, actuacións musicais e folclóricas e unha exposición de produtos típicos da zona conformarán o groso do programa, que está a ser ultimado estes días polos organizadores.