A Festa da Castaña do Courel chega á súa vixésima edición mentres se ensaian novas fórmulas para aproveitar economicamente este recurso tradicional da serra
31 oct 2007 . Actualizado a las 02:00 h.O próximo día 10 celebrarase en Seoane a vixésima edición da Festa da Castaña do Courel, un dos festexos gastronómicos máis veteranos do sur lucense. A pesar destes dous decenios de promoción -aos que se suma a Festa da Pisa da Castaña que se organiza desde hai nove anos en Froxán- e a pesar de que a Xunta ten catalogada a Serra do Courel entre as seis principais áreas produtoras galegas, o aproveitamento económico deste recurso tradicional experimentou poucas mudanzas nos últimos tempos.
A recollida e a venda de castañas segue sendo un complemento económico de maior ou menor importancia para moitos veciños do Courel, nunha medida que é difícil de calcular, xa que a demanda depende moito de como se dea a colleita noutras zonas produtoras. Tamén é complicado calcular canto é o froito que fica sen recoller cada ano -hai quen supón que a cifra pode atinxir ata o 70% e mesmo o 90% do total- debido ao declive demográfico, ao envellecemento da poboación e ao abandono en que caeu grande parte dos soutos da serra. A maior parte do froito recollido para a venda sae do Courel sen transformar, pero actualmente están surxindo iniciativas que poden axudar a cambiar esta situación.
A primeira iniciativa partiu de dúas veciñas do Courel, Concepción Arza e Elena López, que crearon unha pequena empresa para fabricar e comercializar a tarta Caurelá, elaborada exclusivamente a base de castañas da zona. A experiencia máis recente neste campo -iniciada pouco despois da anterior- está ser levada a cabo por Verónica Núñez e Daniel Arza, que se dispoñen a poñer en plena produción a súa firma Caurelor, dedicada a elaborar marmelada de castañas e castañas en xarope, entre outros produtos. A empresa ten solicitado o selo oficial de produción ecolóxica.
O matrimonio, que ten repartidas as instalacións da súa pequena empresa entre Folgoso e Quiroga, considera que a elaboración de produtos a base de castaña podería constituír unha interesante fonte de emprego para outros veciños da zona. «Nós ata estaríamos dispostos a unirnos a outros para formar unha cooperativa de produtores ou facer algunha outra cousa en conxunto, pero de momento non vexo quen se anime», explica Daniel Arza. «En moitas aldeas non queda máis que xente maior e á xente nova é difícil convencela de que podería gañar a vida apañando castañas», engade. O problema, na súa opinión, non está na falta de apoio oficial. «Nós pedimos unha axuda á Consellería de Medio Rural e tivemos toda as facilidades para conseguila», apunta o empresario, sinalando que talvez se necesitarían máis campañas de promoción e de formación para animar a outros a emprender iniciativas deste tipo.
Os propietarios de Caurelor esperan utilizar este ano arredor de 6.000 quilos de castañas para elaborar os seus produtos, que polo momento serán distribuídos no mercado galego, pero que aspiran a saír a outras zonas no futuro se se cumpren as expectativas da empresa. Segundo Daniel Arza, «no Courel hai moita castaña que se podería vender ou transformar, pero a que se recolle hoxe é só a que medra nas zonas de bosque máis próximas ás aldeas. Hai tempo que case ninguén vai recoller castañas no interior dos soutos, que ademais están cada vez máis cheos de maleza», agrega.