A Festa da Castaña de Folgoso tená como pregoeiros aos escolares do colexio local
LEMOS
A Festa da Castaña do Courel celebrarase este ano o 7 de novembro e terá uns pregoeiros moi pouco habituais. Os organizadores da edición número 23 deste certame decidiron encomendarlle este papel aos estudantes do colexio Uxío Novoneyra, de Seoane. A segunda novidade é que os asistentes á festa poderán estrear un novo acceso ao souto no que se asan as castañas. Ademais, nesta ocasión haberá chocolatada con música o día 6 para os visitantes que elixan achegarse ao Courel con antelación.
A festa da castaña celébrase cada ano de forma alterna nas localidades de Folgoso e Seoane. Este ano toca en Folgoso, onde o lugar elixido habitualmente para o asado das castañas é o Souto da Carroza. Até agora, esa localización tiña o problema de que para que o público dese chegado ao magosto era preciso utilizar pasos de servidume das hortas dos veciños. Este ano xa non fará falta, porque o Concello e a Consellería de Presidencia recuperaron o camiño tradicional que unía Folgoso coa aldea veciña de Santa Eufemia, e o seu percorrido pasa polo souto.
Esta edición da festa está organizada de xeito conxunto pola asociación A Coroa e o Concello do Courel.