O Concello de Sober convoca en Twitter un certame fotográfico sobre os viños de Amandi
LEMOS
![](https://img.lavdg.com/sc/wC92G9nHX5xYmWVLjaH8-FH-SpA=/480x/2017/04/04/00121491330003323841715/Foto/MA5C4F6_201824.jpg)
O concurso coincidirá coa próxima edición da feira vinícola local, que se celebrará esta fin de semana
07 abr 2017 . Actualizado a las 23:34 h.O Concello de Sober convocou un concurso de fotografía ao que poderán presentarse imaxes relacionadas cos viños de Amandi que deberán ser publicadas na rede social Twitter. O certame abrirase esta fin de semana, coincidindo coa celebración da 37 edición da feira vinícola soberina. Os participantes deben ser seguidores da conta do Concello en Twitter e terán que publicar as imaxes acompañadas do hashtag #enchesoberdeamandi e do enderezo @concellodesober.
O xurado do concurso, formado por profesionais da imaxe, escollerá tres imaxes que recibirán respectivamente un premio principal e dous accésits. Os galardóns consistirán en lotes de viños de Amandi. Tres días despois de finalizado o concurso daranse a coñecer os nomes dos gañadores nas redes sociais. Os premiados terán tres días de prazo para contactar co Consello a fin de confirmar a súa identidade. En caso de non facelo, perderán a condición de gañadores e a organización contará cos autores doutras imaxes escollidas como posibles premiadas.
O alcalde, Luis Fernández Guitián, sinala que a finalidade deste concurso fotográfico é axudar a dar máis visibilidade á Feira do Viño de Amandi nas redes sociais.