A asociación de avicultores artesanais da Ribeira Sacra mostrará diferentes variedades na Feira da Rosca de Sober
05 ago 2018 . Actualizado a las 05:00 h.Os xoves de hoxe en día dispoñen de calquera tipo de información en Internet, que se converteu no primeiro método de aprendizaxe sen ter que moverse da casa. Porén, o mundo da avicultura necesita o contacto directo coas diferentes aves para coñecer como é o proceso desde o coidado do ovo ata a crianza. Iso é o que quere transmitir Jesús, un dos socios da asociación de avicultores artesanais da Ribeira Sacra.
-Qué tipo de asociación é esta?
-É a primeira asociación de avicultores de razas variadas que hai en Galicia, porque as dúas que existen son dunha raza soamente.
-Cantos socios ten actualmente?
-Somos actualmente oito socios de toda a Ribeira Sacra, que formábamos parte doutras asociacións de fóra de Galicia. Encontrámonos por grupos de Internet e interesounos facer una asociación deste tipo. Hai xa peticións de máis xente para asociarse, pero as aceptaremos cando teñamos as nosas bases.
-Cando naceu a asociación?
-Esta asociación ten unhas semanas de vida e agora comezamos a preparar diferentes actividades, como a que vaise ver na Feira da Rosca de Sober, onde estarán presentes máis de vinte razas de galiñas. Xa temos todo feito fundacionalmente falando.
-Cal é o obxectivo desta iniciativa?
-Achegar ás persoas información sobre as galiñas e sobre todo da avicultura, algo que se vai facendo en Galicia durante moito tempo. Queremos dar a coñecer todos os tipos de galiñas que hai en España, cerca dunhas corenta razas autóctonas, e en Europa ou no mundo. A xente cre que todas son iguais, pero non. Entre os oitos criadores, contamos con cerca de trinta razas de galiñas.
-Cándo se iniciou na avicultura?
-Na miña casa e na casa dos meus avós houbo galiñas de toda a vida. Desde o ano 2012 son socio dalgunha asociación pertencente á federación española, e crío animais de razas puras, máis concretamente razas europeas. Na miña casa hai máis de cen galiñas de sete razas distintas. É un pouco pasatempo.
-Dispoñen dalgunha axuda para sustentar as súas actividades?
-Empezamos os socios poñendo dos nosos petos os cartos. É unha asociación sen ánimo de lucro e todo o que se vai gañando cos donativos, feiras ou exposicións, vai ser para seguir achegándonos á xente. O que queremos é facer máis exposicións periódicas, queremos ir a escolas cunha incubadora ou crear unha caseira, ir a asociacións de veciños para explicar os distintos tipos de razas e informar dos coidados, porque hai poucos veterinarios especializados en aves.
-Cáles son os seus retos?
-É volver á tradición. En Galicia todas as casas antigamente tiñan galiñas. Os pequenos teñen que encariñarse a estes animais desde pequenos, como nos pasou a nosoutros. Ademais, moita xente non sabe como coidar a estas aves polo que queremos explicar como crialas dunha forma correcta. Queremos o benestar animal.
-Qué previsión de crecemento teñen?
-A previsión é ter vinte socios, aumentar o numero de gaiolas para facer exposicións máis grandes e poder facer cada un ou dous meses cursos gratuítos a escolas ou asociacións. É necesario que a xente experimente na súa propia pel o que experimentamos nós cada vez que nacen novas crías.
-Cree que a industria avícola ten bastante futuro en España?
-Totalmente. O único que necesitamos é que entre xente con gañas de achegar este mundo a todo o público.