O BNG celebra o centenario da asemblea galeguista cunha homenaxe á militancia histórica
LEMOS
![Movilización nacionalista en Monforte, en la pasada década de los ochenta](https://img.lavdg.com/sc/tSemKkuw6uJbaeILwnvrMuVbdsE=/480x/2022/02/17/00121645121822438976778/Foto/MF18C4F1_191541.jpg)
A voceira nacional sumarase aos actos conmemorativos que terán lugar o domingo en Monforte
18 feb 2022 . Actualizado a las 05:00 h.Os actos programados mañá sábado polo Consello da Cultura Galega, a Fundación Otero Pedrayo e a Fundación Vicente Risco non serán nos únicos que se celebren esta fin de semana en Monforte para conmemorar o centenario da cuarta Asemblea Nacionalista das Irmandades da Fala. O BNG organizou para o domingo diversas actividades con ese motivo que contarán coa presenza de Ana Pontón, voceira nacional desta organización política.
O programa conmemorativo do BNG desenvolverase a partir das dez e media da mañá do domingo na Casa de Cultura Lois Pereiro. Trala apertura, o profesor de historia contemporánea Uxío-Breogán Diéguez Cequiel impartirá no salón de actos a conferencia «As Irmandades da Fala e o Centenario da IV Asemblea Nacionalista». Seguidamente, comezará nese mesmo escenario un coloquio sobre a militancia nacionalista na ditadura, moderado pola responsable comarcal, Rosa Anta Prieto, no que intervirán Ana Pontón, Xosé Manuel Rodríguez, Lois Diéguez e Marisa Vázquez Barquero.
A unha do mediodía, por outro lado, terá lugar una homenaxe á militancia histórica do nacionalismo na entrada do mosteiro de San Vicente do Pino, escenario no ano 1922 dun retrato de grupo no que aparecen Castelao e outros destacados integrantes das Irmandades da Fala. Os actos promovidos polo BNG concluirán cunha comida de confraternidade.
«Chamamos á participación en todos os actos da fin de semana, que no seu conxunto darán unha visión bastante completa do que supuxo a devandita asemblea», sinala dende o consello comarcal. Monforte, segundo destacan dende o BNG, «foi testemuña dos inicios do percorrido do movemento político nacionalista galego anterior á guerra e posterior á ditadura franquista».