Óscar Moure: «A min sempre me gustou o despacho dentro do banquillo, pero adestro na base»
LEMOS
Ao igual que a afección lemista, Óscar Moure na súa condición de socio tamén está ilusionado co novo proxecto. Asegura que o paran na rúa para transmitirlle esa ilusión. O executivo reivindica o protagonismo da canteira, e tamén di que o atrae máis traballar no despacho perfilando plantillas.
—Percibe na afección ilusión polo que está por vir?
—É verdade que se nota esa ilusión na rúa, e enténdoo porque o esforzo que fixo o club é importante. Seguro que durante a tempada virán momentos difíciles, e aí pido que o público e o socio estean a carón do equipo. Todos van traballar para dar alegrías á afección.
—Este Lemos ten ADN Edu Rodríguez e Óscar Moure.
—Hai unha aposta decidida pola xuventude. De feito, algunhas fichaxes son de futbolistas novos, con talento e con certa experiencia. Hai unha combinación de xuventude e veteranía. Os novos dan esa enerxía que é necesaria para que o equipo estea arriba na clasificación.
—Agora, tocaralle descansar ao director deportivo, porque o traballo está feito.
—Si, aproveitarei estes días para desconectar. É verdade que dende maio ata hoxe non paramos de traballar.
—Será máis difícil para o Lemos competir no grupo sur da Preferente?
—Penso que os dous grupos son parellos. É verdade que aos equipos do grupo norte xa os coñeciamos e neste grupo teremos que adaptarnos. Pero, insisto, non será escusa.
—Onde se sinte máis cómodo, no despacho ou no banquillo?
—Sempre me gustou o despacho dentro do banquillo, é dicir, ver xogadores, confeccionar plantillas e planificar. E si, teño que dicir que cada vez gústame máis o despacho.