A Pobra do Brollón celebra o seu festival de brindos na parroquia de Ferreiros
A POBRA DO BROLLÓN
O Brindadeira chega este ano á súa terceira edición
15 jul 2025 . Actualizado a las 13:18 h.A parroquia de Ferreiros, na Pobra do Brollón, volve converterse este sábado 19 e domingo 20 de xullo no epicentro da tradición oral co festival Brindadeira, unha iniciativa que busca recuperar o brindo, un xénero de improvisación cantada propio da comarca e tamén doutras zonas da montaña lucense e do Bierzo.
Organizada polo Concello da Pobra do Brollón en colaboración coa asociación veciñal de Ferreiros, esta terceira edición terá lugar no local social e no campo da festa parroquial, cunha programación diversa e de entrada libre.
A xornada comezará ás 18:30 horas cun obradoiro de brindos dirixido a público de todas as idades. Ás 20:00 horas, dará comezo un espectáculo de brindo e regueifa co colectivo Erre que Erre, seguido dunha actividade de micro aberto para quen queira participar.
Ás 21:00 horas, a música tomará o protagonismo co concerto dos cantareiros de Cántigas e Frores, procedentes de Lugo. Para pechar a noite, La Sincereza DJ porá a música nunha sesión para bailar.
O domingo comezará ás 11:30 horas cunha andaina pola aldea de Ferreiros, guiada por veciños e brindeiros. Ao final do percorrido, celebrarase no campo da festa a primera edición da cata de tortillas Brindadeira. Os participantes poderán levar as súas propias tortillas para compartir, e as tres máis votadas recibirán un premio.
Brindadeira xurdiu en 2023 como un proxecto do Concello da Pobra do Brollón pensado co obxectivo de revitalizar esta tradición oral.