Coa participación de Nerea Puime, nacida neste municipio e traballadora do observatorio astronómico Ramón María Aller
08 mar 2025 . Actualizado a las 19:45 h.O Concello de Bóveda celebrou este 8 de marzo unha sesión conmemorativa dedicada a mulleres astrónomas que destacaron neste campo da ciencia, unha iniciativa organizada en colaboración co Observatorio Astronómico Ramón María Aller da Universidade de Santiago (USC). O acto, enmarcado nas actividades polo Día Internacional da Muller, tivo como obxectivo destacar o labor de numerosas mulleres no campo da astronomía, un traballo que, a pesar do seu valor, non sempre recibiu o recoñecemento merecido.
A xornada, coordinada polo catedrático José Ángel Docobo, contou coa participación de persoal deste observatorio, colaboradores e alumnado en prácticas. Entre os asistentes figuraron Nerea Puime, natural da parroquia de Martín, no municipio de Bóveda, Eva Seijas, Ángel Castro, David Area e o doutor Luca Piccotti.
A convocatoria serviu para percorrer a historia das astrónomas, dende as pioneiras da antiga Grecia e Alexandría ata as científicas contemporáneas, subliñando as súas contribucións ao avance do coñecemento astronómico. A iniciativa non só buscou visibilizar o papel destas mulleres, senón tamén inspirar ás novas xeracións a seguir os seus pasos no ámbito científico.
No Concello de Bóveda explican que esta actividade reflicte o compromiso dos responsables municipais e do observatorio astronómico Ramón María Aller coa divulgación científica e co recoñecemento do papel das mulleres na ciencia, especialmente nun campo tradicionalmente dominado por homes. A sesión foi unha oportunidade para reflexionar sobre a necesidade de seguir avanzando na igualdade e no recoñecemento do talento feminino en todos os ámbitos.