Os personaxes típicos de varios festexos galegos participan no Domingo Lambedoiro, que inaugura o Entroido Ribeirao
17 feb 2025 . Actualizado a las 18:17 h.Un desfile de personaxes representativos de varios carnavais tradicionais galegos polas rúas de Chantada abriu durante a mañá deste domingo a primeira xornada do Entroido Ribeirao do municipio, que inaugura o ciclo festivo no sur da provincia. Na «Xuntanza de entroidos» —así é denominada a convocatoria— participaron as figuras típicas dos entroidos de Chantada, Salcedo —no municipio da Pobra do Brollón—, Viana do Bolo e Sobradelo, no concello de Xunqueira de Ambía. Tamén estaba anunciada a presenza dos troteiros do carnaval tradicional de Bande, pero finalmente non puideron participar nesta xornada.
Os participantes no desfile da mañá tamén estarán presentes durante a tarde deste domingo na celebración do Entroido Ribeirao na parroquia de Santiago de Arriba. As seguintes xornadas do ciclo carnavalesco de Chantada serán o próximo día 23 e o 2 e o 4 de marzo. En todos os casos, as actuacións dos personaxes típicos do festexo —volantes, peliqueiros e mecos— comezarán en torno ás catro da tarde en Santiago de Arriba. A organización corre a cargo da asociación Amigos do Entroido Ribeirao.
Por outra parte, a capital do municipio acollerá o 1 de marzo o desfile de comparsas de Carnaval. Como en anos anteriores, irá encabezado polos personaxes tradicionais do Entroido Ribeirao. O desfile comezará ás 16.00 horas na avenida de Lugo —á altura da residencia DomusVi— e discorrerá ata a praza de Galicia. As bases do certame establecen dúas categorías: unha de adultos e outra infantil, para grupos formados ao menos nun 70% por menores de 14 anos. Este ano, ademais, haberá novos premios de carácter local que serán compatibles cos anteriores. As bases poden consultarse na páxina web do Concello.