Piden alternativas en Chantada aos fogos artificiais, que xa foron polémicos nas festas de Monforte
CHANTADA
Os socialistas de Chantada fixeron público este martes un comunicado no que solicitan ao Concello de Chantada que reconsidere a celebración do espectáculo de fogos artificiais nas festas patronais. O voceiro do PSOE chantadino, Mariano López, sostén que «o Concello debe actuar con responsabilidade».
No comunicado, os socialistas lembran que no concello xa sufriron recentemente un lume, concretamente na parroquia de Sampaio de Muradelle. «Afortunadamente —explican— coa inestimable axuda dos gandeiros da zona coas súas cisternas foi controlado». Por iso, dende o partido socialista invitan a «valorar opcións alternativas que non incrementen o perigo nestes días críticos», subliña Mariano López.
No contexto da vaga de incendios sufridos en Galicia nas últimas semanas, este partido fai unha chamada ao Concello para que tome medidas con relación aos fogos artificiais, «dado que a Xunta de Galicia non tomou medidas en relación co uso de pirotecnia estes días». Dende o PSOE chantadino lembran que o pasado venres en Baiona un espectáculo de fogos artificiais provocou un incendio, o que engade outra razón para que o goberno local reflexione sobre «se manter o evento simbólico» do luns das festas merece a pena.
Os socialistas destacan, por outra parte, a importancia da labor diaria de gandeiros e agricultores que «resulta fundamental para previr os lumes», ao igual que o traballo de axentes e bombeiros forestais, corpos e forzas de seguridade, tractoristas e veciños que están a colaborar na extinción das chamas.
Polémica en Monforte
O lanzamento das sesión de fogos de artificio durante as recentes festas de Monforte tamén resultou polémico. Esperta Monforte pediu desculpas á cidadanía por unha decisión que este partido cualifica de «inadecuada e desafortunada nun momento especialmente crítico». Tamén o BNG cuestiona a decisión do goberno monfortino de lanzar os foguetes. «É incomprensible que, mentres milleiros de hectáreas arden, o propio Concello decida manter dous espectáculos pirotécnicos seguidos».