Quiroga prepara unha homenaxe aos pioneiros que levantaron a Feira do Viño

O Concello de Quiroga avanza na organización da Feira do Viño 2025, que fai a número 43 e se vai celebrar os días 18, 19 e 20 de abril. Este ano, o certame incluirá un acto especial de recoñecemento aos primeiros organizadores da feira, aqueles que lle deron vida entre os anos 1980 e 1985 e sentaron as bases do que hoxe é unha das festas dedicadas ao viño máis destacadas de Galicia.

O tenente de alcalde, Vicente Parra, preside a comisión encargada de preparar esta homenaxe, que terá lugar o venres 18 de abril como acto de apertura da feira.

A homenaxe constará de dúas partes: unha dedicada aos pioneiros que impulsaron a feira nos seus inicios e outra para os que os acompañaron naqueles primeiros anos.

Ademais, o acto incluirá unha pequena exposición con documentación gráfica sobre aquelas primeiras edicións nos anos 80.

Un ciclo de recoñecementos

Esta iniciativa pecha un ciclo de recoñecementos que comezou no ano 2021, cando, debido á pandemia, a feira non se puido celebrar e no seu lugar o Concello organizou unha homenaxe aos viticultores mediante unha exposición e unha revista. Agora, o foco está nos fundadores, aqueles que traballaron para que a Feira do Viño de Quiroga acadase o recoñecemento que ten na actualidade.

Para completar a exposición, Vicente Parra fai un chamamento público a quen posúa fotografías ou documentos gráficos das primeiras edicións, as comprendidas entre 1980 e 1985. As imaxes poderán entregarse na Casa da Cultura en horario de mañá, onde se dixitalizarán para despois ser devoltas aos seus donos.

No Concello de Quiroga apuntan que con iniciativas así a Feira do Viño de Quiroga consolídase así non só como unha mostra da riqueza vitivinícola da zona, senón tamén como un espazo de memoria colectiva, onde se valora o esforzo daqueles que fixeron posible que este certame siga a crecer, 43 anos despois do seu nacemento.

---

---

---