A Sociedade Deportiva e Cultural Polvorín quere transmitir seu máis profundo agradecemento ante as numerosas mostras de condolencia recibidas tralo tráxico pasamento do xogador do noso equipo xuvenil, Oladipo Adewunmi Oyebola. O noso primeiro agarimo ten que ser para os pais de Dipo, Samuel e Cristina, aos que desexamos que o grande sufrimento destes días se torne en ledicia ao ver crecer ao seu fillo pequeno. As portas da nosa casa están abertas para que dentro de pouco tempo o nove amarelo volva as costas dun Oyebola. Tamén nos acordamos dos numerosos clubes de Galicia que se acordaron de nós nestes difíciles momentos, esquecendo cores e rivalidades. Tampouco podemos esquecernos da importantísima tarefa das institucións, especialmente importante en casos coma este. Moitas grazas ao Concello de Lugo, personalizado no seu Alcalde, José López Orozco e no seu Concelleiro de Deporte e ademais amigo, Xosé Manuel Díaz Grandío. O noso agradecemento tamén a Deputación e a Xunta. Grazas aos partidos políticos que nos transmitiron o seu apoio. Grazas Quique Rozas. Non pode quedar sen mención os nosos patrocinadores ASport 21 e Frisaqués. Grazas por estar ao noso carón, por acompañarnos dende o primeiro momento ata o último. Para finalizar quixeramos mandar un mensaxe de gratitude a todas aquelas persoas que a título individual estiveron aí, ao pe do canón, facendo máis fáciles estes días.