O centro educativo aproveita as festas para fomentar entre os seus alumnos a recuperación de materiais de refugallo dentro das actividades de educación ambiental do programa Voz Natura
22 dic 2024 . Actualizado a las 05:00 h.O proxecto que se desenvolve durante este curso no colexio público Antonio Fernández López, na localidade de Oural —no municipio de Sarria— dentro do programa de educación ambiental Voz Natura leva o nome de «Obradoiros sostibles». A reciclaxe de cartóns, a cociña e as instalacións eléctricas son algunhas das súas temáticas. «Facemos fincapé en todo o proceso, desde a materia prima necesaria para a súa elaboración á concienciación sobre a importancia do aproveitamento dos recursos, evitando o consumismo excesivo», explican os profesores. Algúns destes obradoiros desenvólvense no patio do centro educativo.
Para a celebración do pasado Samaín, os alumnos decoraron o colexio aproveitando diferentes materiais de refugallo que trouxeron das súas casas. «Sempre contamos cun gran apoio por parte das familias», din os docentes. Seguindo o mesmo principio de fomentar a reciclaxe de materiais usados, para as festas de Nadal traballouse na decoración do colexio con pezas elaboradas con cartón. «O material de refugallo tamén é a base da decoración da árbore de Nadal e da composición do belén», sinalan os docentes. Nestas últimas semanas, por outro lado, o claustro profesoral participou nun curso de impresión en tres dimensións no que permitiu comprobar as posibilidades que ofrece unha impresora deste tipo da que dispón o colexio. «Con ela podemos obter pezas para facer construcións de grandes dimensións e como exemplo construímos un reno cun trineo», engaden os profesores.
Durante esta temporada, así mesmo, leváronse a cabo outras actividades de educación ambiental que foron incluídas nun calendario de Advento que se organizou desde a biblioteca escolar. «Entre outras iniciativas, elaboramos postais e imáns, e desenvolvemos un obradoiro de costura no que fixemos calcetíns e outro de reciclaxe de follas de millo no que elaboramos centros de mesa de Nadal», indican desde o centro.
Actividades no horto
Por outra parte, os alumnos e docentes do colexio de Oural seguen a traballar durante este curso no seu horto escolar. Durante o pasado verán fíxose unha limpeza nunha zona anexa a este espazo a fin de dispor de máis terreo para as plantacións. A finais do curso anterior instalouse un sistema de rego automático nos bancais e en parte do céspede do patio. Durante este ano escolar preténdese aumentalo a todo o horto. As actividades que se desenvolveron no horto escolar no que vai de curso comezaron coa recollida de produtos de outono, como patacas, castañas e mazás. Posteriormente organizouse un obradoiro de cociña no que se elaborou torta e compota de mazá. As castañas degustáronse no magosto. Así mesmo, podáronse as plantas aromáticas —lavanda e menta— que se cultivan nalgúns bancais. Despois de secar as ramas, trituráronse e utilizáronse para facer saquiños aromáticos. Ademais, realizáronse as plantacións de outono no horto —fabas, chícharos, espinacas, acelgas, nabos, allos e cenorias—, que se retrasaron un pouco polas condicións meteorolóxicas.
A anpa do colexio, por outro lado, organizou durante este trimestres varias saídas didácticas á gandería Quintián do Páramo, ao museo do mel do Valadouro, ao Museo da Auga e a Natureza de Alfoz e ao pazo de Vilane en Antas de Ulla.
Voz Natura é un programa de La Voz de Galicia desenvolvido pola Fundación Santiago Rey Fernández-Latorre que conta co patrocinio da Consellería de Medio Ambiente, Territorio e Vivenda, a Deputación da Coruña, a Fundación Alcoa, El Corte Inglés, a Fundación Ramón Areces e Inditex.