Representantes dos concellos da comarca de Sarria realizaron este venres unha visita ao novo local, que atende a nenos e nenas en idade de 0 a 6 anos e as súas familias
23 may 2025 . Actualizado a las 20:31 h.Os alcaldes (ou representantes dos mesmos) da agrupación de concellos de Sarria, Láncara, O Páramo, Triacastela, Samos, Paradela e O Incio realizaron este venres unha visita as novas instalacións do Servizo de Atención Temperá da comarca, reafirmando o seu compromiso co mesmo. Trátase dun novo local situado no número 20-22 da Avenida de Becerreá, en Sarria.
A xuntanza, segundo explican, foi proposta e organizada polo Concello de Sarria, a entidade que asume a tramitación da subvención da Xunta para levar a cabo o servizo, ademais de levar a cabo a xestión administrativa precisa para o seu funcionamento e a supervisión e coordinación directa co equipo profesional que dende ese espazo atende aos nenos e nenas e as súas familias. Neste caso, aseguran, o obxectivo da xuntanza foi coñecer de primeira man os espazos e recursos recentemente habilitados para mellorar a calidade da atención prestada.
Esta visita fíxose para visibilizar a labor diaria dun servizo esencial para o benestar infantil, recoñecendo a súa relevancia tanto no apoio ao desenvolvemento integral dos nenos e nenas como no acompañamento ás súas familias», indica Isabel Vergara, a edila de Igualdade do Concello de Sarria.
«Ademais, o servizo estase a consolidar como un referente para a comunidade a través da organización de xornadas e iniciativas que poñen o foco na infancia e nas súas necesidades, en estreita coordinación co sistema sanitario, educativo e social», engade Vergara. E conclúe: «Con esta visita institucional, os concellos da agrupación reafirman a súa aposta por un modelo de atención pública, próxima e sensible, que sitúe a infancia no centro das políticas sociais e educativas».