A Mancomunidade de Municipios Galegos do Camiño Francés, presidida por Triacastela, deu este martes a benvida en Portomarín a un grupo de peregrinos procedentes de Pistoya (Italia), localidade onde se promocionou esta ruta xacobea ao longo de 2024
18 jun 2025 . Actualizado a las 10:29 h.A Mancomunidade de Municipios Galegos do Camiño Francés, presidida polo concello de Triacastela, recibiu este martes en Portomarín a un grupo de peregrinos procedentes da localidade italiana de Pistoya, onde a entidade levou a cabo accións de promoción do Camiño Francés ao longo do ano 2024.
O encontro contou coa presenza dos alcaldes de Portomarín, Pablo Rivas; Paradela, Montserrat Mulet; e Monterroso, Eloy Pérez, en representación da mancomunidade. Durante a recepción, fixéronlles entrega aos peregrinos dun folleto informativo elaborado pola propia mancomunidade, no que se recolle a identidade e os principais recursos de todos e cada un dos concellos galegos que forman parte desta histórica ruta xacobea.
O grupo estaba encabezado por Mario Menici, un peregrino veterano que xa fixera o Camiño por primeira vez no ano 1999 e que, segundo asegura, «non será a última». Desde aquela, repetiu a experiencia en varias ocasións e segue a mostrar un gran vínculo coa ruta e coa cultura galega.
A entrega do folleto a Mario simboliza o recoñecemento da mancomunidade a todas as persoas que escollen este camiño, ao tempo que visibiliza a riqueza patrimonial e turística dos concellos que a conforman. Como sinalaron os representantes locais, o obxectivo é que todos os municipios da mancomunidade estean representados con equidade na promoción do Camiño Francés.