A suspensión da festa provocou confusión na veciñanza e diferentes versións entre o Concello e a Comisión de Festas sobre as causas da cancelación
26 ago 2025 . Actualizado a las 05:00 h.A suspensión da Festa Infantil de Parga, prevista dentro do programa das festas do San Roque, acabou converténdose nun foco de polémica entre o Concello de Guitiriz, a Comisión de Festas e o BNG. O episodio xerou malestar entre veciños e familias que acudiron confiando en que a cita se desenvolvería como en anos anteriores. A falta de información oficial inmediata fixo que, durante varios días, circularan rumores sobre os motivos da cancelación, algo que incrementou a decepción das familias e o malestar no pobo.
O primeiro en reaccionar foi o BNG de Guitiriz, que un día antes do comunicado municipal xa amosara a súa indignación pola cancelación «sen previo aviso nin comunicación oficial». A formación acusou á Alcaldía de falta de transparencia e lembrou que, ao tratarse dun acto patrocinado polo Concello, era responsabilidade da rexedora ofrecer explicacións inmediatas.
Un día despois, o Concello publicou unha nota na que deixou claro que este ano, a diferenza doutros, non contemplara colaborar nin organizar a Festa Infantil. Ademais, recoñeceron como erro non desmentir a inclusión do seu logotipo no cartel oficial das festas, algo que —segundo admitiron— puido inducir a erro. O goberno local tamén afirmou que a Comisión fora informada con anterioridade e que, por tanto, a responsabilidade da cancelación non recaía sobre a administración municipal.
A resposta por parte da Comisión ante a falta de información
Ante o desconcerto, a Comisión de Festas decidiu remitir unha carta explicativa, pero non como comunicado xeral, senón dirixida especificamente aos comuneiros de Parga, xa que «foron eles quen colaboraron para facer posible a festa». As integrantes da Comisión recoñeceron que «debían unha explicación como veciñas e como persoal encargado da Comisión», ao considerar que o silencio inicial contribuíu a que se estenderan comentarios e críticas nas redes.
Na súa versión, lembran que antes de elaborar os carteis consultaron coa Alcaldía sobre a posible colaboración, recibindo a resposta de que se intentaría aportar algunha «colchoneta». Ante esa contestación, deron por feito que había apoio municipal, como en anos anteriores, e puxeron o logotipo do Concello nos carteis. «Nós despreocupámonos do tema», recoñecen, ata que o 14 de agosto —un día antes do comezo das festas— a alcaldesa manifestou que «non se comprometera a nada e que este ano non puidera ser».
A Comisión admite que o seu erro foi non facer público o problema de inmediato: «Aínda confiábamos en que chegado o momento non nos deixaran abandonados». Porén, piden desculpas ao pobo e lamentan non ter podido buscar unha alternativa «debido principalmente a temas económicos e á falta de recursos».
Tras preguntar á alcaldesa de Guitiriz, Marisol Morandeira, polas declaracións da Comisión, a rexidora optou por non entrar en valoracións e limitouse a reiterar o contido do comunicado emitido previamente polo Concello.