O conselleiro de Cultura, José López Campos, e o director de cine Oliver Laxe asinaron este xoves en Navia de Suarna o convenio de colaboración polo que a Xunta inviste 50.000 euros na campaña de promoción internacional do filme
27 nov 2025 . Actualizado a las 20:31 h.O conselleiro de Cultura, Lingua e Xuventude, José López Campos, e o director de cine Oliver Laxe asinaron este xoves en Navia de Suarna o convenio de colaboración a través do que a Xunta inviste 50.000 euros na campaña de promoción internacional da película Sirat como candidata de España para optar ao Oscar á mellor película internacional.
López Campos e Jacobo Sutil, director da Axencia Galega das Industrias Culturais, foron recibidos polo cineasta en Casa Quindós, sede da Asociación Ser na aldea de Vilela, onde tamén tiveron a oportunidade de coñecer máis o proxecto cultural que Laxe desenvolve na súa antiga casa familiar.
O titular de Cultura aproveitou a visita para felicitalo polos éxitos que a súa cuarta longametraxe está a colleitar neste camiño cara aos Oscar. Así, conta tamén con nove candidaturas aos Premios de Cine Europeo, ademais de optar ao de mellor película internacional nos BIFA (British Independent Film Awards). O filme, que xa se alzou co Premio do Xurado do Festival de Cannes, conseguiu tamén o Hugo de Ouro no de Chicago.
Sirat atópase agora en plena campaña para impulsar o seu posicionamento entre o resto das candidatas internacionais e acadar a máxima visibilidade entre os membros da academia estadounidense que votarán nesta 98ª edición dos Oscar. Con este obxectivo, volve contar co apoio da Xunta, que xa cofinanciara a súa produción cunha subvención de 260.000 euros.
Este novo investimento responde tanto ao alto valor artístico e técnico da película como á oportunidade única que para o conxunto do audiovisual galego supón o feito de contar cunha embaixadora nos premios máis relevantes do panorama mundial. De feito, esta é a primeira vez que un director galego é seleccionado para representar a España nos Oscar e faino, ademais, cun filme con participación galega na súa produción.