Concellos de Lugo poñen en marcha unha iniciativa para fomentar a formación de desempregados de colectivos vulnerables

O Concello de Outeiro de Rei, en colaboración cos Concellos de Friol, Rábade, Begonte, Cospeito, Castro de Rei, Abadín e Mondoñedo, vén de anunciar o inicio do Programa Integrado de Emprego 2024/25, unha iniciativa destinada a «fomentar a inserción laboral de persoas desempregadas pertencentes a colectivos vulnerables». O programa contará cun financiamento de 220.000 euros procedentes dos fondos públicos do Servizo Público de Emprego Estatal.

O proxecto diríxese a colectivos como persoas con discapacidade, en risco de exclusión social, vítimas de violencia de xénero, menores de 30 anos con baixa cualificación, persoas migrantes e mozas e mozos cualificados menores de 30 anos. Segundo informaron os responsables municipais, as accións previstas inclúen actividades como información, orientación e asesoramento, formación en habilidades sociolaborais e obradoiros de entrevista, prospección empresarial, prácticas profesionais non laborais e cursos específicos de formación. Entre estes últimos destacan áreas como competencias dixitais, condución de carretilla elevadora, manipulación de alimentos, xestión de residuos e acompañamento no transporte escolar.

Unha das principais novidades do programa será a introdución de medidas de conciliación para facilitar a asistencia ás actividades, así como o pagamento dunha bolsa económica de 10 euros por cada día de participación. «Queremos eliminar todas as barreiras posibles para que as persoas desempregadas poidan beneficiarse deste programa e acceder a novas oportunidades no mercado laboral», sinalaron desde o Concello de Outeiro de Rei.

As persoas interesadas en participar deberán estar desempregadas e inscritas no Servizo Público de Emprego Estatal. Para inscribirse, poden contactar co Concello de Outeiro de Rei no teléfono 663 915 957, preferentemente en horario de 9.00 a 15.00 horas.

---

---

---