As pezas foron doadas pola víúva do artista, Florence Normier
02 mar 2023 . Actualizado a las 17:10 h.O Museo Provincial de Lugo contará con dúas obras do escultor José Díaz Fuentes (Sarria 1940-Paris 2010) nas súas coleccións de Belas Artes. Trátase de «Laparada» (cedida), unha escultura en ferro, que pode verse no xardín do Museo Provincial de Lugo na Rúa Nova, e de «Retablo» (doada), unha peza artellada en madeira, ferro, teas e corda, que conxuga escultura e debuxo, como mostra da riqueza tradicional do traballo da madeira en Galicia. Instalarase na Sala 24 do Museo Provincial de Lugo.
A vicepresidenta da Deputación, Maite Ferreiro, agradeceu «a xenerosidade da viúva do escultor Florence Normier, que permitirá ampliar a colección de escultura galega contemporánea do Museo de Lugo incorporando a obra dun artista, que malia transladarse a Francia a comezos dos setenta, alimentou o seu universo creativo das paisaxes da natureza e do patrimonio artístico, arquitectónico, literario e musical ligado ao Camiño de Santiago que viviu en Sarria».
As pezas formaron parte da mostra «José Díaz Fuentes. Retrospectiva. A árbore interior», que se clausurou este martes no Museo Provincial de Lugo despois de tres meses.No acto de entrega das pezas estiveron Maite Ferreiro, Aurelia Balseiro (directora do Museo Provincial) e Encarna Lago (xerente da Rede Museística Provincial) con Florence Normier e Mina Vrillet, comisaria da exposición clausurada.